Qazaqstanda qaıyr surap, azamattardyń mazasyn alǵan adamdar jaýapkershilikke tartylady
ASTANA. QazAqparat - 2015 jyldyń 1 qańtarynan bastap, Qazaqstanda qaıyr surap, azamattardyń mazasyn alǵan adamdardy jaýapkershilikke tarta bastaıdy. Bul týraly búgin OKQ-de ótken brıfıngte QR ІІM Ákimshilik polıtsııa komıtetiniń tóraǵasy Igor Lepeha málimdedi.
«Quqyqbuzýshylyqqa qatysty jaýapkershilikti arttyrý boıynsha normatıvtik-quqyqtyq aktilerdi jetildirý jumystary júrgizilip jatyr. Sonyń nátıjesinde, 1 qańtardan bastap, kúshine enetin jańadan qabyldanǵan Ákimshilik quqyqbuzýshylyq kodeksinde qoǵamdyq tártip pen adamgershilik qundylyqtardy buzýshylyqqa qoldanylatyn jazalar kúsheıtilgen», - dedi I.Lepeha.
Onyń aıtýynsha, Kodekste usaq buzaqylyqqa qoldanylatyn jazalar kúsheıtilgen. «Eger búgingi tańda usaq qylmystar úshin aıyppul 3-10 AEK arasynda bolsa, jańa qujatta tek qana 10 AEK aıyppul salynatyn bolady. Tipti, keı jaǵdaıda ákimshilik arest te qarastyrylǵan», - dedi ol. Sondaı-aq jańa kodekste tynyshtyq buzý, belgilenbegen jerde ishimdik ishý jáne temeki shegý sııaqty quqyqbuzýshylyqtardyń jazasy da edáýir kúsheıtilgen.
«Budan bólek, qaıyr tileý men azamattardyń mazasyn alý syndy qylyqtar úshin de jaýapkershilikke tartýdy qarastyratyn arnaıy bap paıda boldy», - dep atap ótti I.Lepeha.
