Qazaqstanda qaıtys bolǵannan keıin aǵza donory bolýǵa kelisim bergender sany artty
ASTANA. KAZINFORM - Bul týraly «Respýblıkalyq transplantologııa jáne joǵary tehnologııalyq medıtsınalyq qyzmetterdi úılestirý ortalyǵynyń» dırektory Aıdar Sıtkazınov málimdedi.
Onyń aıtýynsha, 2023 jyly eGov portalyndaǵy erik bildirý tiziliminde qaıtys bolǵannan keıin aǵza donory bolýǵa kelisim bergenderdiń sany shamamen eki myń bolsa, bıylǵy alty aıdyń qorytyndysy boıynsha bul kórsetkish 16 myń 109 adamǵa jetken.
– Bul – qoǵamnyń donorlyqqa degen kózqarasy birtindep ózgerip kele jatqanyn kórsetetin jaqsy úrdis. Aqparattandyrý jumystarynyń nátıjesi de bar. Degenmen bul baǵyttaǵy túsindirý jumystaryn jalǵastyrý qajet. Oǵan úkimettik emes uıymdar men aǵza transplantatsııasynan ótken patsıentter de belsendi qatysýy tıis, – dedi Aıdar Sıtkazınov.
Degenmen onyń sózinshe, qaıtys bolǵannan keıin donor bolýdan bas tartqandar sany da az emes.
– Bas tartqandardyń sany da shamamen on ese ósti. Máselen, eGov portalyndaǵy erik bildirý tiziliminde 156 174 adam donor bolýǵa kelispegen. Bul da azamattardyń óz erki men jeke sheshimi, - dedi Aıdar Sıtkazınov.
Ortalyq basshysynyń aıtýynsha, aǵza donorlyǵy máselesin tek dárigerler kótermeýi kerek. Medıtsına mamandary qoǵamǵa túsindirý jumystaryn júrgizip, barlyq protsestiń ashyq bolýyn qamtamasyz etýge tıis. Al bul bastamany qoldaýǵa qoǵamdyq jáne patsıenttik uıymdar da atsalysýy qajet.
Sonymen qosa spıker bir qaıtys bolǵan donordyń birneshe adamnyń ómirin saqtap qalýǵa múmkindik beretinin atap ótti. Alaıda qandaı aǵzalardy alýǵa bolatyny týystarynyń kelisimine baılanysty.
– Bir donordan jeti aǵzaǵa deıin alynýy múmkin. Biraq bul jerde de týystarynyń kelisimi qajet. Olar tek júrekti nemese tek búırekti alýǵa kelisim berýi múmkin. Eger barlyq aǵzasy saý bolsa, júrek, eki búırek, baýyr, ókpe jáne kózdiń qasań qabyǵy alynyp, jeti adamǵa deıin kómek kórsetýge bolady, – dedi ortalyq basshysy.
Onyń aıtýynsha, transplantatsııa kezeginde turǵan patsıentterdiń barlyǵy birinshi toptaǵy múgedektigi bar azamattar. Olar memlekettik járdemaqy alady jáne memleket tarapynan turaqty qoldaýdy qajet etedi.
Eske salaıyq, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
