Qazaqstanda qaıta qylmys jasaıtyndar sany azaıdy
ASTANA. QazAqparat - Qazaqstanda probatsııa qyzmetiniń engizilýi arqasynda qylmystyń qaıtalanýy 44,5 paıyzǵa tómendedi. Bul týraly búgin QR ІІM Qylmystyq-atqarý komıteti tóraǵasynyń orynbasary Meıram Aıýbaev málim etti.
«Probatsııanyń negizgi maqsaty - esepte turǵan synaq merzimdegilerdiń qylmysqa qaıta barýyn aldyn alý. Probatsııa qyzmetiniń esebine turǵyzylǵandardyń sany byltyr toǵyz aıda 34 656 adam bolsa, bıyl - 41 093 qurady», - dep atap ótti M.Aıýbaev.
Onyń aıtýyna qaraǵanda, osynyń áserinen bas bostandyǵynan aıyrý oryndarynan merziminen buryn bosaǵandar arasynda qaıta qylmys jasaıtyndar sany tómendedi.
«Eger 2014 jyly 493 qylmys jasalǵan bolsa, 2015 jyly - 263 retsıdıv tirkeldi. Kórsetkish boıynsha, bul 200 qylmysqa nemese 40,3 paıyzǵa kem. Bul bizdiń 200 azamatymyzdyń taǵdyry, quqyqtary men múddesi qorǵaldy degen sóz», - deıdi ol.
M.Aıýbaevtyń habarlaǵanyndaı, probatsııa qyzmetinde esepte turǵandar arasynda qylmysqa qaıta barý 44 paıyzǵa az bolǵan.
«Bul tek jalǵyz probatsııa qyzmetiniń eńbegi ǵana emes, bul qabyldanǵan keshendi sharalardyń arqasynda múmkin boldy. Atap aıtqanda, jańa Qylmystyq kodeks pen Qylmystyq-protsessýaldyq kodeks qabyldandy, sonymen qatar bul probatsııa ofıtserleri men probatsııalyq baqylaýdyń qatysýshylary qol jetkizgen ortaq jeńis», - dedi M.Aıýbaev.
Aıta keteıik, probatsııa qyzmeti Qazaqstanda 2012 jyldyń aqpan aıynda quryldy. Bıylǵy jyly qabyldanǵan jańa Qylmystyq kodeks pen Qylmystyq-protsessýaldyq kodeks probatsııa qyzmetine baqylaý fýnktsııalaryn kúsheıtip qana qoımaı, sondaı-aq áleýmettik kómek tetikterin qoldanýǵa da múmkindikter berdi.
