Qazaqstanda qaıyrymdylyq salasyndaǵy qurmetti ataqqa qujat qabyldaý bastaldy

Qurmetti ataq qaıyrymdylyqty damytýǵa eleýli úles qosqan azamattardy, qaıyrymdylyq uıymdary men volonterlerdi mynadaı baǵyttar boıynsha marapattaý maqsatynda beriledi:

• týǵan ólkeni qoldaýǵa jáne damytýǵa arnalǵan aýqymdy áleýmettik jobalardy júzege asyrý;
• az qamtylǵan jáne kópbalaly otbasylarǵa, erekshe qajettiligi bar balalarǵa, ata-anasynyń qamqorlyǵynsyz qalǵan nemese qıyn ómirlik jaǵdaıǵa tap bolǵan balalarǵa, halyqtyń áleýmettik osal toptaryna, Uly Otan soǵysynyń ardagerleri men zeınetkerlerge óteýsiz qoldaý bildirý; 
•  Qazaqstan Respýblıkasynyń azamattaryna, sheteldikterge, azamattyǵy joq adamdarǵa, qandastarǵa, sondaı-aq tótenshe jaǵdaıdan zardap shekken aýmaqtarǵa járdemdesý;
• Qazaqstandaǵy jáne sheteldegi medıtsınalyq uıymdarda shuǵyl aqyly em alýǵa muqtaj azamattarǵa qaıyrymdylyq kómek kórsetý;
• ǵylym, ınnovatsııa, bilim, mádenıet, óner jáne sport salalaryn qoldaýǵa, tarıhı jáne etnomádenı murany saqtaýǵa qoldaý kórsetý;
• janýarlardy qorǵaý men olardyń ál-aýqatyn jaqsartýǵa úles qosý; 
•  kásipkerlik sýbektileri arasynda korporatıvtik qaıyrymdylyqty damytý.

Qujattar bıylǵy 1 tamyz ben 1 qyrkúıek aralyǵynda (qosa alǵanda) qabyldanady. Konkýrsqa qatysý úshin qujattardy Qazaqstan Respýblıkasy Mádenıet jáne aqparat mınıstrligi qabyldaıdy.

Qujattardy memlekettik organdar, jeke jáne zańdy tulǵalar myna tásilderdiń biri arqyly usyna alady:

1. a.isimbayeva@mki.gov.kz elektrondyq poshtasyna (DOC, DOCX nemese PDF formatynda);

2. Mınıstrliktiń keńsesine qaǵaz jáne elektrondyq tasymaldaǵyshta (CD-dısk nemese USB flesh-jınaqtaýshyda DOC, DOCX nemese PDF formatynda) qolma-qol ótkizý nemese habarlamasy bar tapsyrys hatpen poshta arqyly joldaý.

Konkýrsqa qatysý úshin memlekettik organdar, jeke jáne zańdy tulǵalar myna qujattardy tapsyrady:

1. qaıyrymdylyq salasyndaǵy qurmetti ataq berý qaǵıdalaryna 1 jáne 2-qosymshalarǵa sáıkes nysan boıynsha usynys;

2. dıplomdardyń, gramotalardyń jáne alǵys hattardyń kóshirmeleri (bar bolsa);

3. qurmetti ataqqa úmitkerdiń nemese ol týraly jarııalanǵan maqalalar men jarııalanymdardyń kóshirmeleri (bar bolsa);

4. áleýmettik jelidegi paraqshasyna silteme (bar bolsa). Qurmetti ataq alǵannan keıin úsh jyl ishinde úmitkerdi qaıta usynýǵa jol berilmeıdi. Qaıyrymdylyq sýbektileri qurmetti ataqqa bir ǵana baǵyt boıynsha usynylady.

Jeńimpazdardy azamattyq qoǵam, kvazımemlekettik sektor jáne memlekettik organdar ókilderi kiretin Konkýrstyq komıssııa aıqyndaıdy.

Eske salaıyq, buǵan deıin elimizde qaıyrymdylyq uıymdarynyń biryńǵaı tizilimi jasalatynyn habarlaǵan edik.