Qazaqstanda qaıǵyly oqıǵalardan bolatyn ólim-jitim 23,1 paıyzǵa tómendedi

ASTANA. QazAqparat - Táýelsizdik jyldarynda Qazaqstanda qaıǵyly oqıǵalardan, jaraqattaný men ýlanýdan bolatyn ólim-jitim 23,1 paıyzǵa tómendedi (1991 jyly 100 myń turǵynǵa shaqqanda 107,3-ten 2015 jyly 82,5-ke deıin). Bul týraly QR Densaýlyq saqtaý jáne áleýmettik damý mınıstrliginen habarlandy.

Densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń aıasynda jol-kólik jaraqatyn tómendetý maqsatynda Іshki ister mınıstrligimen birlese otyryp kóliktik medıtsına qurylǵan bolatyn. Bul rette sanıtarlyq avıatsııa, joldaǵy medıtsınalyq-qutqarý beketteri qamtylyp otyr.

Sanıtarlyq avıatsııa qyzmeti 5 jyldyń ishinde aımaqtardaǵy aýyr haldegi emdelýshilerge 6,7 myńnan astam ushyrylym jasady. Ómirge qaýip tóndiretin kórsetkishter boıynsha 6 myńnan astam naýqas tasymaldanyp, 500 ota oqıǵa ornynda jasaldy.

«Respýblıkalyq mańyzy bar joldardyń asa qaýipti ýchaskelerinde joldaǵy 40 medıtsınalyq-qutqarý beketteri quryldy. 5 jylda jol-kólik oqıǵalary oryn alǵan jerlerge 4 myńnan astam qyzmet kórsetilip, 12 myńnan asa zardap shekkenderge, onyń ishinde 800 balaǵa medıtsınalyq kómek kórsetildi», - dep atap ótilgen vedomstvo málimetinde.