Qazaqstanda qaı ýnıversıtetke túsken durys

ASTANA. QazAqparat - Qazirgi kezde 43 mamandyq boıynsha arnaıy reıtıng ázirlenip jatyr. Sonyń negizinde qaı ýnıversıtettiń oqý baǵdarlamasy tıimdi, al eń bastysy, ony bitirgennen keıin jas mamandardyń jumysqa turý deńgeıi qandaı ekenin kórýge bolady, dep xabarlaıdy QazAqparat tilshisi. 

QR Bilim jáne ǵylym vıtse-mınıstri Talǵat Eshenqulovtyń aıtýynsha, atalǵan reıtıng "Atameken" ulttyq kásipkerler palatasymen birlesip daıyndalýda.

"Buǵan deıin biz IT-di shyǵardyq. Endi shilde aıynda 700 oqý baǵdarlamasynyń reıtıngisi jarııalanady. Onyń ishine 43 mamandyq kiredi. Máselen, jýrnalısterdi birneshe joǵary oqý orny daıarlaıdy. Biz olardyń oqý baǵdarlamalaryn tıimdiligine qaraı ornalastyramyz. Bir ýnıversıtette zańgerlerdi jaqsy daıyndaıdy, biraq sol ýnıversıtette ekonomıka nashar oqytylýy múmkin. Sonyń bári reıtıngte kórinis tabady. Soǵan qarap, ýnıversıetti tańdaýǵa bolady. Árıne, ýnıversıtet túlekteriniń jumysqa turý kórsetkishi eskeriledi. Tipti, sol jumysta alatyn aılyq jalaqysy da eskeriledi", - dedi T.Eshenqulov QazAqparat tilshisine bergen suxbatynda.

Onyń aıtýynsha, reıtıng daıyn bolǵannan keıin arnaıy baspasóz máslıxaty uıymdastyrylady. Sol jerde mınıstrlik oqý baǵdarlamalary reıtıngisin resmı túrde tanystyrady.

"Negizi, ol reıtıng mektep túlekterine ǵana emes, jumys berýshige de qajet. Mysaly, oǵan jaqsy bir zańger nemese ınjener kerek deıikshi. Ol reıtıngke qarap, kórsetkishi joǵary ýnıversıtet túlekterin tańdaı alady", - dep atap kórsetti T.Eshenqulov.