Qazaqstanda qaı salyq túrleri qysqaratyny belgili boldy

ASTANA. QazAqparat - Premer-Mınıstrdiń orynbasary - Qarjy mınıstri Erulan Jamaýbaev Memleket basshysynyń elimizdegi salyqty azaıtýǵa qatysty tapsyrmasyn oryndaý jospary týraly aıtty, dep habarlaıdy QazAqparat tilshisi.

«Qazir biz jańa Salyq kodeksin ázirlep jatyrmyz. Jaqynda Úkimet deńgeıinde talqylaǵan soń, qujat jobasyn jarııalaımyz. Onda tıisti tyń qadamdar qamtylady», - dedi E. Jamaýbaev Parlament Májilisinde tilshiler suraǵyna jaýap bere otyryp.

Mınıstr bul negizinen alymdarǵa qatysty bolatynyn aıtty.

«Bizde júıeli ári mańyzdy 2-3 salyq túri bar. Onyń qatarynda korporatıvtik tabys salyǵy, qosylǵan qun salyǵy jáne paıdaly qazbalardy óndirý salyǵy qamtylǵan. Bul salyq túrleri qalady. Biraq shaǵyn alymdar, jarnama úshin nemese basqa da baǵyttaǵy alymdar qysqartylýy múmkin», - dedi mınıstr.

Bıylǵy Joldaýda Memleket basshysy Qasym-Jomart Toqaev salyq salasyndaǵy baqylaýdy tolyq tsıfrlandyrýdy júrgizý jáne salyq boıynsha eseptilik nysandaryn 30 paıyzǵa qysqartý qajet ekenin aıtty.

«Salyq jáne bıýdjetke tólenetin basqa da mindetti tólemderdiń jalpy sanyn kem degende 20 paıyzǵa azaıtýǵa bolady jáne qajet», - dedi Prezıdent.