Qazaqstanda qaı salalarda ınvestıtsııanyń ósimi bar
NUR-SULTAN. QazAqparat – QR Ulttyq ekonomıka mınıstri Áset Erǵalıev ınvestıtsııalyq belsendilik baıqalǵan salalar men óńirlerdi atady, dep habarlaıdy QazAqparat tilshisi.
«Ken óndirý ónerkásibin esepke almaǵanda, negizgi kapıtalǵa ınvestıtsııalardyń ósimi 25,5% boldy. Investıtsııalardyń ósýi qurylysta – 2,3 ese, óńdeý ónerkásibinde – 82%, onyń ishinde tamaq ónimderi óndirisinde – 24%, aqparat jáne baılanysta – 53%, aýyl sharýashylyǵynda – 47%, saýda – 46%, jyljymaıtyn múlikpen operatsııalarda – 29%, kólikte – 19% deńgeıin kórsetti», - dedi Ulttyq ekonomıka mınıstri búgingi Úkimet otyrysynda.
Onyń aıtýynsha, bıylǵy qańtar-sáýir aılarynda syrtqy saýda taýar aınalymy 28,1 mlrd dollar boldy, onyń ishinde eksport – 16,7 mlrd dollar. Bul rette óńdelgen taýarlar eksporty 16,2%-ǵa ósip, 5,4 mlrd dollarǵa jetken.
«Taýarlar ımporty 11,4 mlrd dollardy qurady. Osylaısha 5,3 mlrd dollar deńgeıinde oń saýda balansy qamtamasyz etildi. Óńdeý ónerkásibi ónerkásiptik óndiris dınamıkasyndaǵy úrdisterdi aıqyndaýdy jalǵastyrýda. Ósim 7,2%-dy qurady.
14 óńir óńdeý ónerkásibinde oń qarqyn kórsetti. Eń joǵarǵy kórsetkish Almaty qalasynda, Almaty oblysynda jáne Nur-Sultan qalasynda baıqalýda.
Óńdeý ónerkásibinde tómendeý 3 óńirde tirkeldi. Olar – Batys Qazaqstan, Atyraý jáne Shyǵys Qazaqstan oblystary», - deıdi Á. Erǵalıev.
Mınıstr kóptegen óńirlerde joǵary ınvestıtsııalyq belsendilik baıqalǵanyn atap ótti. Eń joǵarǵy kórsetkish Túrkistan jáne Pavlodar oblystarynda, Almaty men Nur-Sultan qalalarynda baıqalady. Investıtsııa kóleminiń tómendeýi Batys Qazaqstan jáne Atyraý oblystarynda tirkelgen.
