Qazaqstanda qaı salaǵa jasandy ıntellekt belsendi engizilip jatyr
ASTANA. KAZINFORM – Jasandy ıntellektini damytýǵa baǵyttalǵan keshendi sharalardy iske asyrý aıasynda elimizde «Industrial AI Accelerator» jobasy iske qosyldy. Joba týraly Tsıfrlyq damý, ınnovatsııalar jáne aeroǵarysh ónerkásibi mınıstrligi Jasandy ıntellekt jáne ınnovatsııalardy damytý komıtetiniń tóraǵasy Ǵızzat Baıtursynov aıtyp berdi.
– Bul ekonomıkanyń negizgi salalaryna jasandy ıntellekt sheshimderin engizýge baǵyttalǵan akseleratsııalyq baǵdarlama. Baǵdarlama komandalardy irikteý men oqytýdan bastap, salalyq baǵyttar boıynsha pılottyq jobalardy súıemeldeý jáne iske qosýǵa deıingi barlyq negizgi kezeńdi qamtıdy, - dedi Ǵızzat Baıtursynov ortalyq kommýnıkatsııalar qyzmeti alańynda ótken baspasóz máslıhatynda.
Jasandy ıntellekt sheshimderin engizýge baǵyttalǵan akseleratsııalyq baǵdarlamanyń birinshi kezeńi kelesi salany qamtydy:
- Taý-ken ónerkásibi (Mining) — Ónerkásip jáne qurylys mınıstrligi;
- Energetıka jáne munaı óndirý salasy (EnergyTech) — Energetıka mınıstrligi;
- Medıtsınalyq tehnologııalar (MedTech) — Densaýlyq saqtaý mınıstrligi;
- Qarjy tehnologııalary (FinTech) — «Astana» halyqaralyq qarjy ortalyǵy (AHQO);
- Memlekettik tehnologııalar (GovTech) — Ulttyq aqparattyq tehnologııalar» AQ.
Odan ári mınıstrlik ókili akseleratsııalyq baǵdarlamanyń birinshi kezeńiniń nátıjesimen bólisti.
– Baǵdarlamaǵa qatysýshy kompanııalardan 116 ótinim qabyldandy, 32 kompanııa irikteýden ótip, akseleratsııa baǵdarlamasyn sátti aıaqtady. 3 aı ishinde túrli salada 27 pılottyq joba iske qosyldy. Sol sııaqty 4 joba pılottyq rejımde júzege asyrylyp, tıimdiligi men aýqymyn keńeıtý áleýetin rastady, - deıdi Ǵ. Baıtursynov.
Buǵan deıin jasandy ıntellektini damytý komıtetiniń basshysy JI-di engizý jappaı jumyssyzdyqqa alyp kelmeı me degen saýalǵa jaýap berdi.
Sondaı-aq elimizde oqýshydan memlekettik qyzmetshige deıin jasandy ıntellektini meńgeretinin jáne onyń mańyzy týraly jazǵan edik.
Aıta keteıik, aldaǵy bes jylda 1 mln-ǵa jýyq qazaqstandyq jasandy ıntellektini meńgeredi.
Eske salaıyq, Qazaqstan Chat GPT sekildi óz jasandy ıntellektisin jasap shyǵarmaq. Aqyldy júıe KazLLM dep atalady.