Qazaqstanda qaı salada jemqorlyq isi kóp tirkeledi
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev sybaılas jemqorlyqqa qatysty qylmys jıi tirkeletin salalardy atady, dep habarlaıdy «QazAqparat» HAA tilshisi.
«Sybaılas jemqorlyqqa qatysty anyqtalǵan qylmystyń kóbin ákimdik qyzmetshileri (718), ishki ister organdarynyń qyzmetshileri( 323) men kvazımemlekettik sektordyń jumysshylary (239) jasaǵan. Bilim salasynda (201), aýyl sharýashylyǵy (183), qurylys (158), densaýlyq saqtaý (101) salalarynda jemqorlyq qylmysqa barý táýekelderi áli de joǵary bolyp tur», - deıdi Alık Shpekbaev vedomstvonyń alqa otyrysynda.
Agenttik tóraǵasynyń aıtýynsha, 2017 jyly júıeli minezdemesi bar 108 jemqorlyqqa qatysty qylmys tirkelip, 320 adam qylmystyq jaýapkershilikke tartylǵan. Jalpy, Agenttik ótken jyly 1835 sybaılas jemqorlyqqa qatysty istiń betin ashqan. 5 uıymdasqan qylmystyq toptyń áreketine tosqaýyl qoıylyp, qolǵa alynǵan sharalardyń arqasynda memleket qazynasyna 14 mlrd teńge qaıtarylǵan. Qylmystyń basym kópshiligi - paraqorlyqqa baılanysty (40 paıyz nemese 988) tirkelip otyr.
«Jalpy, sybaılas jemqorlyqqa qatysty jalpy quny 15,8 mlrd teńge shyǵyn keltirgen zań buzýshylyq anyqtalyp, búginge deıin ol somanyń 88 paıyzy, ıaǵnı 14 mıllıard teńgesi qaıtaryldy. Memlekettik baǵdarlamardy júzege asyrý barysynda jasalǵan 400 jemqorlyq qylmysy áshkere boldy. Ol baǵytta memleketke 5,3 mıllıard teńgeniń shyǵyny keltirilgen. Búgingi tańda ol somanyń 87 paıyzy, ıaǵnı 4,6 mıllıardy qaıtaryldy». - deıdi Alık Shpekbaev.
