Qazaqstanda qaı salada áıelder kóp ekeni belgili boldy
ASTANA. KAZINFORM – 2026 jylǵy I toqsanda halyqtyń jumyspen qamtylýyn iriktep zertteýi derekteri boıynsha, Qazaqstandaǵy jumyspen qamtylǵan áıelder sany 4 527,1 myń adamǵa jetti. Ulttyq statıstıka bıýrosy málimetinshe, bul ótken jyldyń sáıkes kezeńimen salystyrǵanda 42,6 myń adamǵa nemese 0,9% kóp.
Olardyń ishinde 3 602,0 myń adam (ekonomıkadaǵy jumyspen qamtylǵan áıelderdiń jalpy sanynyń 79,6%) jaldamaly qyzmetkerler bolsa, 925,1 myń adam (20,4%) ózin-ózi jumyspen qamtyǵandar.
Jumyspen qamtylǵan áıelderdiń eń kóp úlesi dástúrli túrde bilim berý salasynda shoǵyrlanǵan. Bul salada 902,2 myń áıel eńbek etedi, bul jumyspen qamtylǵan áıelderdiń jalpy sanynyń 19,9%-y. Ekinshi orynda kóterme jáne bólshek saýda salasy – 877,6 myń adam (19,4%), úshinshi orynda densaýlyq saqtaý jáne halyqqa áleýmettik qyzmet kórsetý salasy – 426,3 myń adam (9,4%). Sondaı-aq ónerkásipte 388,1 myń áıel (8,6%), aýyl, orman jáne balyq sharýashylyǵy salasynda 351,2 myń áıel (7,8%) jumyspen qamtylǵan.
Bir jyl ishinde jumyspen qamtylǵan áıelder sanynyń eń joǵary ósimi jyljymaıtyn múlikpen operatsııalar salasynda (+25,7%), ákimshilik jáne qosalqy qyzmet kórsetý salasynda (+21,9%), kólik jáne qoımalaý qyzmetinde (+16,2%) jáne ónerkásipte (+7,6%) tirkeldi.
Óńirler bólinisinde jumyspen qamtylǵan áıelder sanynyń eń joǵary ósimi Qaraǵandy oblysynda (+7,8%), Aqtóbe oblysynda (+6,5%), Almaty qalasynda (+6,3%) jáne Túrkistan oblysynda (+6,1%) baıqaldy.
Qala halqy arasynda jumyspen qamtylǵan áıelder sany aýyldyq jerlermen salystyrǵanda joǵary boldy. Qalalyq jerlerde jumyspen qamtylǵan áıelder sany 3 008,5 myń adam.
Aıta keteıik, Qazaqstanda aptap ystyqtyń júkti áıelderge áseri zertteledi.
