Qazaqstanda qaı maýsymda páter alǵan tıimdi
ASTANA. KAZINFORM – Páterdi qaı kezde alǵan tıimdi? Ádette bul suraqqa «qysta arzan bolady» degen jaýap aıtylady. Biraq sońǵy tórt jyldaǵy derekter Qazaqstandaǵy turǵyn úı naryǵy aýladaǵy aýa temperatýrasyna «baǵyna bermeıtinin» kórsetip tur. Kazinfrom tilshisi Ulttyq statıstıka málimetterine súıenip osy tendentsııany taldap kórdi.
2023 jyl: jańa páter – qańtarda, qaıtalama naryq – tamyzda
2023 jyly jańa páterdiń eń tómen baǵasy jyl basynda qalyptasty. Qańtarda bir sharshy metr 478 myń teńge shamasynda boldy. Jyl ishinde baǵa birtindep ósip, jeltoqsanda 494 898 teńgege jetti. Osylaısha, jańa baspananyń eń arzan kezeńi qańtar, eń qymbat kezeńi jeltoqsan boldy.
Qaıtalama naryqta baǵa qozǵalysy ózgeshe bolǵan. Jyldyń alǵashqy aılarynan keıin baǵa tómendep, tamyzda eń tómen deńgeıge tústi – 485 633 teńge/m². Maýsymda bul kórsetkish 503 185 teńge bolǵan. Tamyzdan keıin baǵa qaıta kóterile bastady. Jeltoqsanda sharshy metr 494 373 teńgege jetti. Demek, 2023 jyly qaıtalama naryqtaǵy eń arzan aı tamyz, eń qymbat aı maýsym boldy.
Jyl sońyndaǵy baǵa jyl basyndaǵy deńgeıden joǵary bolǵan jańa úıde de, jazdaǵy mınımýmnan keıin qymbattaǵan qaıtalama naryqta da jyldyń sońyna qaraı baspana baǵasy ósti.
2024 jyl: eki naryqta da jyl sońy qymbat boldy
2024 jyly jańa úı baǵasy naýryzda eń tómen deńgeıge tústi – 486 579 teńge/m². Odan keıin baǵa qaıta ósti. Jeltoqsanda jańa turǵyn úıdiń sharshy metri 500 198 teńgege jetip, jyl ishindegi eń joǵary deńgeıge shyqty.
Qaıtalama naryqta eń tómen baǵa jyl basyna sáıkes keldi. Qańtarda sharshy metrdiń quny 492 myń teńge shamasynda bolsa, keıin baǵa birtindep kóterilip, jeltoqsanda 516 203 teńgege jetti. Bul – 2024 jylǵy eń joǵary kórsetkish.
ıAǵnı 2024 jyly eki naryqta da jyldyń sońǵy aılary qymbat kezeńge aınaldy. Jańa úıde mınımým baǵa naýryzda, qaıtalama naryqta qańtarda qalyptasty.
2025 jyl: eń arzan kezeń – jyldyń basy, eń qymbat kezeń – jeltoqsan
2025 jyly baǵa jyl basynan sońyna deıin aıqyn ósti. Jańa úıdiń bir sharshy metri qańtarda 499 983 teńge boldy. Odan keıin baǵa aı saıyn kóterilip, jeltoqsanda 571 220 teńgege jetti. Bul – jyl ishindegi eń joǵary deńgeı.
Qaıtalama naryqta da eń tómen baǵa qańtarda tirkeldi – 526 788 teńge/m². Jyl ishinde birneshe aıda ǵana qysqa merzimdi tómendeýler boldy, biraq baǵa qaıta kóterilip otyrdy. Jeltoqsanǵa qaraı sharshy metrdiń quny 594 701 teńgegejetip, jyldyq maksımým jańardy.
Sóıtip, 2025 jyly eki naryqta da uqsas tendentsııa tirkeldi:qańtar – eń arzan, jeltoqsan – eń qymbat aı. Jyl sońyna qaraı jańa úı men qaıtalama naryq arasyndaǵy baǵa da aıtarlyqtaı ósti.
2026 jyl: qymbattaý úrdisi tamyzǵa deıin jalǵasty
2026 jyldyń qańtar-tamyz aralyǵynda jańa úı baǵasy tómendegen joq. Naýryzda bir sharshy metr 612 315 teńge bolsa, sáýirde 615 933 teńgege, shildede 621 900 teńgege, tamyzda 625 435 teńgege jetti. Osy segiz aıdaǵy eń joǵary baǵa tamyzda tirkeldi. Eń tómen deńgeı jyl basynda boldy.
Qaıtalama naryqta eń tómen baǵa naýryzda qalyptasty – 624 495 teńge/m². Qańtarda ol 624 561 teńge bolǵan. Mamyrda baǵa 626 203 teńgege, shildede 630 442 teńgege, tamyzda 635 185 teńgege deıin kóterildi.
Osylaısha, 2026 jyldyń alǵashqy segiz aıynda eki naryqta da eń joǵary baǵa tamyzǵa keldi. Jańa úıde tómengi núkte jyl basynda bolsa, qaıtalama naryqta baǵa naýryzda tómendedi.
Jalpy 2026 jyldyń qańtar–tamyz aılarynda turǵyn úıdi satyp alý-satý boıynsha 261 251 mámile tirkeldi. Bul ótken jyldyń osy kezeńinen 4,3%-ǵa az.
Qaı aıda alǵan tıimdi?
Tórt jyldy salystyrǵanda, jańa úıge arzan baǵa kóbine jyldyń basynda tirkelip otyrǵan. 2023 jyly eń tómen baǵa qańtarda, 2024 jyly naýryzda, 2025 jyly qańtarda qalyptasty. 2026 jyldyń alǵashqy segiz aıynda da eń tómen deńgeı jyl basynda tur.
Qaıtalama naryqta bir ǵana turaqty aı joq. 2023 jyly eń arzan kezeń tamyz bolsa, 2024, 2025 jyldary qańtar tıimdi boldy. 2026 jyly eń tómen baǵa naýryzda tirkeldi.
Al eń qymbat kezeń sońǵy jyldary kóbine jyl sońyna nemese jyldyń ekinshi jartysyna keldi. 2023 jyly jańa páter baǵasy jeltoqsanda, 2024, 2025 jyldary eki naryqta da jeltoqsanda maksımým kórsetti. 2026 jyly ázirge tamyzda eń joǵary baǵa kórsetip tur.
Sandardyń jıyntyǵy bir nárseni kórsetedi: jańa páter izdegen adam úshin jyldyń basyndaǵy aılardy, al qaıtalama naryqta qańtar-naýryz aralyǵyn jiti baqylaǵan jón. Biraq 2023 jylǵy tamyzdaǵy jaǵdaı sııaqty erekshelikter de bar. Sondyqtan páter baǵasyn bir ǵana maýsymmen emes, sol jylǵy aılyq qozǵalyspen salystyrǵan durys.
Buǵan deıin, páter saqtandyrýdyń eń joǵary tarıfi Shymkent qalasynda tirkelgenin jazǵan edik.
Munda bir bólmeli páterdi saqtandyrý qyzmeti 70 myń teńgege, al úsh bólmeli páterdi saqtandyrý qyzmetiniń quny 140 myń teńgege deıin jetti. Taraz qalasynda úsh bólmeli páterdi saqtandyrý baǵasy tıimdi. Shamamen 17 myń teńgeden bastalady. Astana men Almaty qalalarynda saqtandyrý baǵasy ózge óńirlerge qaraǵanda joǵary. Tipti bir qalanyń ózinde baǵa ártúrli. Máselen, Almaty qalasynda bir bólmeli páterdi saqtandyrý baǵasy 30-55 myń teńge bolsa, úsh bólmeli páterge 50-96 myń teńge dep eseptep beredi. Jańa oqý jylynyń bastalyp, stýdentterdiń kezekti kelýi Almatydaǵy jaldamaly páterlerdiń baǵasyn 1 aıda 10%-ǵa kóterdi.
Tamyz aıynda eldegi jaldamaly baspanaǵa sýbsıdııa alatyn otbasylar sany 11 myńnan asty.
2022 jyldan beri qazaqstandyq 45 514 otbasy sýbsıdııa alǵan. 34 246 alýshymen jasalǵan shart merziminen buryn buzylǵan: qazirdiń ózinde 20 424 otbasy jalǵa beriletin jáne kredıttik turǵyn úıge ıe bolǵan, qaǵıda talaptaryn saqtamaýyna baılanysty 13 822 otbasymen jasalǵan sharttar buzylǵan. Atalǵan sýbsıdııa jetim balalarǵa, kópbalaly analar men kópbalaly otbasylarǵa, I jáne II toptaǵy múgedektigi bar adamdarǵa, sondaı-aq múgedektigi bar balalardy tárbıelep otyrǵan otbasylarǵa beriledi. Ony alý úshin otbasynyń ár múshesine shaqqandaǵy tabys sońǵy alty aıda aıyna 50 851 teńgeden aspaýǵa tıis. Zeınetaqy men járdemaqy tabys retinde esepke alynbaıdy.
