Qazaqstanda qaýipti óndiristik nysandardy JI baqylaıdy
ASTANA. KAZINFORM – Tsıfrlandyrý aıasynda Qazaqstanda JI elementi bar «e-TJM» biryńǵaı tsıfrlyq platformasy ázirlenip jatyr. Bul týraly Tótenshe jaǵdaılar mınıstri Shyńǵys Árinov Úkimette baıandady.
Júıede qaýipti óndiris nysandaryn esepke alý jáne apattar men jaraqat alýdyń derekter banki, bıznes-protsesterdi avtomattandyrý, sondaı-aq nysandaǵy qaýip-qaterlerdi boljaý kózdelgen. Osy platformada qyzmetkerlerdiń bilimin tekserý proktorıng júıesi arqyly onlaın rejımde júrgiziledi.
– Óndiristik nysandarda monıtorıng júrgizý men olardy baqylaý júıeleriniń ıntegratsııasy jalǵasyp jatyr. Byltyr Memleket basshysynyń tapsyrmasymen 55 shahta men ken orny tekserildi. Onyń ishindegi 45 nysanda jańa qaýipsizdik júıeleri ornatyldy, – dedi Shyńǵys Árinov.
Búgingi tańda 14 shahta men ken ornyndaǵy beınebaqylaý jáne pozıtsııalaý júıeleri mınıstrliktiń Daǵdarys ortalyǵyna qosylǵan, bul jaǵdaıdy onlaın baqylap, jedel den qoıýǵa múmkindik beredi.
Ónerkásiptik qaýipsizdik salasyndaǵy qoldanbaly ǵylymdy damytýǵa jáne ǵylymı jobalardy engizýge de erekshe nazar aýdarylady. Qazirgi ýaqytta Seısmologııa ınstıtýty Qazaqmys nysandarynyń taý-ken ýchaskelerinde paıda bolatyn deformatsııalyq ózgeristerge jáne opyrylyp qulaý qaýpi joǵary aımaqtardyń túzilýine ǵylymı zertteý júrgizip jatyr. Qaýip-qaterge baǵalaý júrgizý tájirıbesi barlyq ónerkásip nysandarynda jalǵasady.
Buǵan deıin sala mınıstri jumysshylar qaza tapqan «Vostoktsvetmet» pen «Qaztsınktegi» apat boıynsha tergeý júrip jatqanyn aıtqan edi.
