Qazaqstanda qaýipti uıymdasqan qylmystyq toptar joq - Krımınaldyq polıtsııa komıtetiniń tóraǵasy
ASTANA. Qarashanyń 23-i. QazAqparat /Jasulan Amanbaıuly/ - Qazaqstanda krımınogendik ahýaldy shıelenistiretin qaýipti uıymdasqan qylmystyq toptar joq.
Bul týraly búgin jýrnalıstermen bolǵan brıfıngte Іshki ister mınıstrligi Krımınaldyq polıtsııa komıtetiniń tóraǵasy Sultan Kúsetov málim etti, dep habarlaıdy QazAqparat.
S.Kúsetovtiń atap kórsetkenindeı, jyl basynan beri 354 qylmystyq is qozǵalsa, onyń 30-y - uıymdasqan qylmystyq top qurǵany, 5-ýi bandıtızm úshin bolǵan.
Memleket basshysynyń tapsyrmasy boıynsha QR ІІM uıymdasqan qylmystyq toptarǵa qarsy kúresti kúsheıtip, sońǵy 11 aıda uıymdasqan qylmystyq toptyń 50 jetekshisi jáne 231 múshesi, sondaı-aq qylmystyq ortanyń 45 «bedeldisi» qylmystyq jaýapkershilikke tartylǵan.
«Uıymdasqan qylmys jelisi boıynsha, izdeýde bolǵan 26 qylmysker ustaldy. Krımınaldyq bedeldilerdiń «urylar dástúrin» qaıta jańǵyrtýǵa jáne krımınogendik ahýaldy kúrdelendirýge tyrysqan áreketteriniń joly kesildi. Máselen, osy maqsatty kózdep kelgen Reseıdiń 4 «zańdaǵy urysy» qylmystyq jaýapkershilikke tartyldy. Bireýi respýblıka shekarasynda ustalyp, elden tys aýmaqqa shyǵaryldy», deıdi S. Kúsetov.
