Qazaqstanda qaýipti qaldyqtardy joıý zaýyty salynbaq
ASTANA. QazAqparat - Qazaqstannyń ortalyq nemese shyǵys óńirinde turaqty organıkalyq lastaýshylardy joıý zaýytynyń qurylysy bastalýy múmkin. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Qorshaǵan orta jáne sý resýrstary mınıstri Nurlan Qapparov málim etti.
«Elektrondy qaldyqtar men eski avtokólikterdi, jıhazdardy kádege jaratý máselesi mańyzdy. Sebebi, qaýipti qaldyqtardy tek qoqysqa laqtyrý saldary keıinnen keri áserin tıgizedi. Bul turǵyda ekologııa men qorshaǵan ortaǵa ǵana emes, sonymen qatar birinshi kezekte halyqtyń densaýlyǵyna zııanyn keltiredi. Bolashaq urpaq úshin barlyq qaýipti qaldyqtardy joıý men kádege jaratý júıesi jolǵa qoıylýy kerek. Osy oraıda mınıstrlik Dúnıejúzilik bankpen birlese otyryp turaqty organıkalyq lastaýshylardy joıý zaýytynyń qurylysy boıynsha jobanyń aıasynda jumys isteýdemiz», - dedi mınıstr.
N.Qapparovtyń sózine qaraǵanda, bul zaýyt Qazaqstannyń ortalyq nemese shyǵys bóliginde ornalasýy múmkin.
«Biz qazir qurylys alańyn tańdap jatyrmyz. Osyndaı zaýyt barlyq qaýipti qaldyqtardy joıatyn bolady. Bul birinshi kezekte iri ónerkásiptik qurylǵylarǵa, ıaǵnı akkýmýlıatorlarǵa, úlken batareıalarǵa jáne energetıkalyq ónerkásiptik qaldyqtarǵa negizdelmek. Osy zaýytta elektronıkanyń jáne basqa da qaldyqtardy joıýǵa bolady», - dedi vedomstvo basshysy.
