Qazaqstanda qaterlik isikke jyl saıyn 36 myń adam shaldyǵady

«Qazirgi ýaqytta Qazaqstanda jetekshi onkologııalyq qaýymdastyqtardyń halyqaralyq hattamalaryna sáıkes keletin onkologııalyq aýrýlardy emdeýdiń qazirgi zamanǵy túrleri júrgizilýde. Targetti terapııa, ımmýnoterapııa jáne gendik ınjenerııa ádisteri belsendi qoldanylady. Barlyq hımıoterapııalyq jáne targettik preparattar tegin medıtsınalyq kómektiń kepildik berilgen kólemi (TMKKK) sheńberinde qamtamasyz etiledi. 2010 jyldan bastap súıek kemigin transplantatsııalaý júrgizilýde. 2012 jyly Qazaqstanda onkopsıhologtardyń jeke kásibı qyzmeti paıda boldy»,- deıdi «Qazaq onkologııa jáne radıologııa ǵylymı-zertteý ınstıtýty» AQ Basqarma tóraǵasy Dılıara Qaıdarova.

Onyń aıtýynsha, skrınıngke jyl saıyn shamamen 4 mlrd teńge bólinedi.

«Qazir adamdar medıtsınalyq tekserýden qorqady. Sondyqtan aýrýlary asqynyp ketedi. Bizde 5 jylǵa arnalǵan keshendi jospar bar, oǵan 35 mlrd-tan astam teńge bólindi. Qazaqstanda jyl saıyn qaterli isiktiń 36 myńǵa jýyq jańa jaǵdaıy tirkeledi. Búgingi kúni dıspanserilik esepte 190 myń adam tur. Jylyna osy qaterli dertten 14 myńanan astam adam qaıtys bolady»,-deıdi bas onkolog.

Sonymen qatar, ol aýrýdy emdeýge barlyq múmkindik bar ekenin atap ótti.

«Mańyzdy jetistik retinde aýrýdyń satysy men taralýyn dál anyqtaýǵa, emdeýdiń ońtaıly rejımderin tańdaýǵa, jeke terapııany qoldanýǵa, sáýlelenýdiń nemese hımıoterapııanyń ońtaıly kýrsyn taǵaıyndaýǵa, emdeýdiń tıimdiligin baqylaýǵa jáne negizsiz operatsııalardy boldyrmaýǵa kómektesetin MRT jáne PET-KT dıagnostıkasyn, molekýlalyq-genetıkalyq zertteýler men telepatologııany engizýdi aıtýǵa bolady. Onkologııalyq aýrýlardyń erte belgilerin anyqtaıtyn jáne anyqtalǵan aýrýlary bar patsıentterge alǵashqy kómek kórsetetin emhanalardyń qyzmetkerleri úlken jumys atqarady. Onkologııalyq aýrýlarmen kúresýdiń Keshendi jospary aıasynda qaterli isiktiń keń taralǵan túrlerimen aýyratyn patsıentterge úıde pallıatıvtik kómek kórsetý boıynsha mobıldi toptardyń jumysy bastaldy», -dedi ol.