Qazaqstanda qaterli isikterdi anyqtaıtyn arnaýly baǵdarlamalar jumys isteıdi - maman

ASTANA. QazAqparat - Qazaqstanda qaterli isikterdi anyqtaıtyn arnaýly baǵdarlamalar jumys isteıdi. Bul týraly búgin Melanomamen kúres kúnine oraılastyrylyp ótkizilgen onkologtar konferentsııasy barysynda QR Densaýlyq saqtaý jáne áleýmettik damý mınıstrliginiń bas dermatovenerology, «Qazaqstan dermatovenerologtary men dermatokosmetologtary qaýymdastyǵynyń» prezıdenti Gúlnar Batpenova aıtty.

«Respýblıkada onkologııalyq aýrýlarmen kúreske úlken kóńil bólingen. Erte kezeńderinde qaterli isikterdi anyqtaýǵa múmkindik beretin birqatar skrınıngterdi qosqanda, arnaýly baǵdarlamalar jumys isteıdi», - dep atap ótti maman.

Onyń aıtýynsha, onkologqa ýaqytyly qaralyp, aýrýdy muqııat emdegen jaǵdaıda, teride paıda bolatyn qaterli isikke shaldyqqan naýqastardyń 95 paıyzyn tolyqtaı emdeýge bolady.

«Osy jaıttardy eskere otyryp, eń mańyzdysy - aýrýdy erte ańǵaryp, teridegi aýrýlardyń aldyn alyp, qaterli óskinderge jol bermeý ekendigin túsingen abzal», - deıdi bas dermatovenerolog.