Qazaqstanda qaterli isikti emdeýdiń jańa tehnologııasy engizilip jatyr
ASTANA. KAZINFORM — Astanadaǵy Ulttyq ǵylymı onkologııa ortalyǵynda Ortalyq Azııada alǵash ret protondyq terapııaǵa arnalǵan jabdyq ornatyldy. Bul tehnologııa sáýleni isikke dál baǵyttap, aınalasyndaǵy saý tinderge túsetin áserdi azaıtýǵa múmkindik beredi.
Sonymen qatar Qazaqstannyń birneshe óńirinde sáýlelik terapııaǵa arnalǵan jabdyqtar jańartylyp, onkologııalyq aýrýlardy emdeý múmkindigi keńeıip keledi.
Onkologııa salasyndaǵy jańalyqtar Astanada ótken Best of ASCO Kazakhstan 2026 halyqaralyq ǵylymı-bilim berý konferentsııasynda talqylandy. Jıynǵa 300-ge jýyq dáriger qatysyp, qaterli isikti dıagnostıkalaý men emdeýdegi jańa tásilderdi talqylap jatyr. Konferentsııa erteń de jalǵasady.
Protondyq terapııa — sáýlemen emdeýdiń zamanaýı túri. Onyń ereksheligi — sáýleniń negizgi qýatyn isik ornalasqan aımaqqa baǵyttaýǵa múmkindik berýi. Osylaısha aınalasyndaǵy saý tinderge túsetin sáýlelik júktemeni azaıtýǵa bolady. Bul tehnologııa keıbir naýqastardy emdeýde mańyzdy bolýy múmkin. Degenmen ony qoldaný múmkindigi aýrýdyń túri men isiktiń ornalasýyna baılanysty anyqtalady.
Elimizde onkologııalyq kómek kórsetetin ortalyqtardyń tehnıkalyq múmkindikteri de kezeń-kezeńimen jańartylyp jatyr. Qazaqstan onkologtar qaýymdastyǵynyń prezıdenti Dılıara Qaıdarovanyń aıtýynsha, sońǵy eki jylda birneshe qaladaǵy sáýlelik terapııa jabdyqtary tolyq jańarǵan.
— Sońǵy eki jylda Semeı, Qostanaı, Petropavl, Astana jáne Almaty qalalaryndaǵy sáýlelik terapııa jabdyqtary tolyq jańartyldy. Jaqyn arada Pavlodarda jańa údetkish ornatylady. Al Qaraǵandyda naýqastarǵa sáýlelik terapııa júrgizýge arnalǵan jańa jabdyqty iske qostyq, — dedi Dılıara Qaıdarova.
Onkologııada emdeý tásilderi de ózgerip keledi. Hımıoterapııamen qatar, isik jasýshalaryndaǵy belgili bir ózgeristerge áser etetin nysanaly preparattar men ımmýndyq júıeniń qaterli jasýshalarǵa qarsy áreketin kúsheıtetin ımmýnoterapııa qoldanylady. Mundaı em túrlerin taǵaıyndaý kezinde isiktiń ereksheligi men naýqastyń jaǵdaıy eskeriledi.
Qazaqstanda ımmýnoterapııaǵa arnalǵan úsh preparat emdeý hattamasyna engizilgen. Budan bólek, nysanaly terapııaǵa arnalǵan 12-ge jýyq preparat qoldanylady. Alaıda jańa dáriler hımıoterapııany tolyq almastyrmaıdy.
Dılıara Qaıdarovanyń sózinshe, hımıoterapııa onkologııalyq aýrýlardy emdeýdegi negizgi tásilderdiń biri bolyp qala beredi. Al nysanaly preparattar isiginde belgili bir mýtatsııa anyqtalǵan naýqastarǵa ǵana taǵaıyndalady. Sondyqtan emdeý ádisi ár naýqasqa jeke tańdalady.
Mamandardyń aıtýynsha, jańa tehnologııalar men dári-dármekterdi engizý onkologııalyq kómektiń múmkindigin keńeıtedi. Al emniń nátıjesi aýrýdyń túrine, satysyna jáne naýqastyń jeke erekshelikterine baılanysty.
Buǵan deıin onkologııada dári-dármek qaýipsizdigin arttyratyn jańa júıe engizilgeni týraly jazǵan edik.
