Qazaqstanda qaterli isikke qarsy dári klınıkalyq synaqtyń ekinshi kezeńine ótti
ASTANA. KAZINFORM – Qazaqstanda onkologııalyq aýrýlardy emdeýge arnalǵan jańa dárilik preparat klınıkalyq synaqtyń ekinshi kezeńine ótti. Bul týraly Úkimette ótken brıfıngide Ǵylym jáne joǵary bilim mınıstri Saıasat Nurbek aıtty.
Mınıstrdiń aıtýynsha, kez kelgen dárilik preparatty ázirleý – 6-7 kezeńnen turatyn kúrdeli protsess. Qazirgi ýaqytta zertteýshiler janýarlarǵa júrgizilgen barlyq klınıkalyq synaq kezeńderin tolyq aıaqtap, adamdarǵa jasalatyn birinshi kezeńnen ótken.
– Biz klınıkalyq synaqtardyń ekinshi kezeńine óttik. Bul kezeńde preparattyń naqty mólsheri anyqtalady, ıaǵnı maksımaldy áser beretin ońtaıly mólsheri esepteledi. Dozany arttyrýdyń kez kelgen ózgerisi qaıtadan ruqsat berý rásimderinen ótedi, – dedi ol brıfıngide.
Qazirgi ýaqytta zertteý jumystaryna Astana onkologııalyq ortalyǵy tartylǵan. Sondaı-aq synaqtar Almaty men Qaraǵandy qalalaryndaǵy onkologııalyq ortalyqtarda da júrgizilip jatyr.
Vedomstvo ókiliniń aıtýynsha, ekinshi kezeńde preparattyń alǵashqy nátıjesi oń dınamıkany kórsetken.
– Birinshi kezeńde Almaty onkoortalyǵynda aýyr onkologııalyq dıagnozy bar naýqastarǵa, sonyń ishinde toq ishek pen asqazan obyry boıynsha zertteý júrgizildi. Ekinshi kezeń nátıjesinde barlyq qatysýshynyń ómir súrý kórsetkishi saqtaldy, al shamamen 30 paıyzynda metastazdardyń jáne isik taralýynyń azaıýy baıqaldy, – dedi spıker.
Qazirgi kezeńde preparattyń dozasy naqtylanyp, onyń basqa onkologııalyq aýrý túrlerine áseri de qosymsha zerttelip jatyr.
- Zertteý nátıjeleri boıynsha bıyl jyldyń sońyna deıin aldyn ala qorytyndy jasalyp, keıin preparatty tirkeýge berý josparlanyp otyr. Sondaı-aq naqty nátıjeler qyrkúıek aıynda ótetin arnaıy brıfıngide jarııalanbaq, - dep tolyqtyrdy mınıstr.
Aıta keteıik, Qazaqstanda onkologııalyq aýrýdyń aldyn alýǵa arnalǵan qospa ázirlenip jatyr.
