Qazaqstanda qaterli isikke qarsy alǵashqy dári jyl sońyna deıin tirkeledi — Saıasat Nurbek
ASTANA. KAZINFORM — Qazaqstanda qaterli isikke qarsy alǵashqy otandyq dárini tirkeý bıyl aıaqtalady dep josparlanyp otyr. Bul týraly Ǵylym jáne joǵary bilim mınıstri Saıasat Nurbek málimdedi.
Mınıstrdiń aıtýynsha, DVC preparaty Nazarbaev Ýnıversıteti janyndaǵy Ulttyq zerthanada ázirlenip jatyr, qazir ol klınıkalyq synaqtardyń sońǵy kezeńinde.
— Ótken jyly preparat adamdarǵa klınıkalyq synaqtan ótti. Qazir synaqtar Astanadaǵy onkologııalyq ortalyq bazasynda jalǵasyp jatyr. Sonymen qatar Qaraǵandydaǵy jáne basqa da óńirlerdegi onkologııalyq ortalyqtar tartylǵan, — dedi Saıasat Nurbek.
Onyń sózinshe, jobanyń merziminiń uzarýyna halyqaralyq talaptardy saqtaý qajettigi sebep bolǵan.
— Preparatty tirkeý úshin ulttyq talaptarmen qatar halyqaralyq standarttardy da oryndaý qajet boldy. Osyǵan baılanysty qosymsha klınıkalyq synaqtar júrgizilip jatyr. Buǵan deıin olar Almatyda ótti, qazir Astanada jáne óńirlerde jalǵasýda. Bul jumystar Densaýlyq saqtaý mınıstrligimen jáne dárilik zattardy tirkeý men saraptaý ulttyq ortalyǵymen birlesip júrgizilýde. Eýrazııalyq ekonomıkalyq odaqtyń talaptary da eskerilip otyr, — dedi mınıstr.
Mınıstrdiń aıtýynsha, barlyq synaqtar aıaqtalǵannan keıin preparatty tirkeýge usyný josparlanyp otyr.
— Bıyl jyldyń sońyna deıin tirkeýge qujat tapsyramyz. Tirkeý rásimi aıaqtalǵan soń preparatty medıtsınalyq uıymdarda qoldanýǵa múmkindik bolady, — dedi ol.
Aıta keteıik, buǵan deıin alǵashqy otandyq qaterli isikke qarsy preparatty 2025 jyldyń sońyna deıin tirkeý josparlanǵan bolatyn.
