Qazaqstanda kassatsııalyq sottar jumysyn bastady

ASTANA. KAZINFORM – Búgin elimizde kassatsııalyq sot qyzmetin bastady. Bul týraly tolyǵyraq Joǵarǵy sot keńesiniń múshesi Erlan Aıtjanov aıtyp berdi.

Erlan Aıtjanovtyń aıtýynsha, bos laýazymǵa úmitkerler áriptestik negizde, zamanaýı HR-quralyn qoldaný arqyly konkýrs arqyly irikteldi. Baǵalaý kezinde úmitkerdiń praktıkalyq tájirıbesi, sýdıalyq eńbek ótili, jumys sapasy, qaraǵan isterdiń kúrdeliligi, bedeli, etıkany saqtaýy, suhbattasý nátıjesi jáne Joǵarǵy Sot pen sýdıalar qoǵamdastyǵynyń qorytyndylary eskerildi.

– Odan bólek, úmitkerlerge qatysty qoǵam men zańgerler qaýymdastyqtyń pikiri, sondaı-aq buqaralyq aqparat quraldaryndaǵy jarııalanymdar da zertteldi, – dedi Erlan Aıtjanov ortalyq kommýnıkatsııalar qyzmeti alańynda ótken baspasóz máslıhatynda.

Spıkerdiń málimetinshe, konkýrsqa 334 úmitker qujat tapsyrǵan, olardyń ishinen biliktilik talaptaryna saı 170 adam irikteýge jiberildi. Nátıjesinde 75 sýdıa usynyldy. Olardyń ishinde 9 maman oblystyq sottarda basshylyq qyzmet atqarǵan, 3-eýi – zań ǵylymdarynyń kandıdaty, 7-eýi – quqyq magıstri.

Aıta ketsek, usynylǵan sýdıalardyń basym bóligi – áıel, ıaǵnı 49 adam nemese 65%, erler – 26 nemese 35%. Spıkerdiń aıtýynsha, áıel sýdıalar úlesi artyp keledi.

Eske salaıyq, bıyl sáýirde 1 shildeden kassatsııalyq sottar jumys isteı bastaıtyny týraly habarlaǵan edik. 

Keshe Memleket basshysy Kassatsııalyq sottardyń tóraǵalary men sýdıalaryn taǵaıyndady.