Qazaqstanda kassatsııalyq sottar jumysyn bastady
ASTANA. KAZINFORM — Qazaqstanda sot júıesiniń qurylymy jańartylyp, kassatsııalyq sottar iske qosyldy. Bul týraly Ortalyq kommýnıkatsııalar qyzmetinde Joǵary Sot Keńesiniń múshesi Janat Ospanova málimdedi.
Onyń aıtýynsha, 2025 jylǵy Ulttyq baıandama sot júıesindegi kadr saıasatynyń jańa sapalyq deńgeıge ótkenin aıqyn kórsetedi.
— Ótken jyldyń negizgi basymdyǵy — sýdıalardyń táýelsizdigin nyǵaıtý jáne kadrlyq quramdy sapaly jańartý boldy, — dedi Janat Ospanova.
Sot júıesindegi mańyzdy ózgeristerdiń biri — kassatsııalyq sottardyń qurylýy.
— 2025 jylǵy 1 shildeden bastap Astana qalasynda úsh derbes óńiraralyq kassatsııalyq sot jumysyn bastady. Bul sot júıesiniń jańa qurylymynyń tolyq qalyptasqanyn bildiredi, — dedi ol.
Atalǵan ózgerister tájirıbeli ári kásibı mamandardy irikteý men baǵalaýdyń jańa tásilderin engizýdi talap etti. Sonyń nátıjesinde Joǵary Sot Keńesiniń róli kúsheıip, sýdıa kadrlaryn basqarýdyń biryńǵaı ortalyǵy retinde qalyptasty.
Aıta keteıik, buǵan deıin sot júıesin reformalaý sot tóreliginiń tıimdiligin arttyrýǵa, ashyqtyqty kúsheıtýge jáne tsıfrlyq tehnologııalardy engizýge baǵyttalǵany aıtylǵan bolatyn.