Qazaqstanda kásiptik bilim berý uıymdarynyń aqparattyq kartasy jasalyp jatyr
ASTANA. KAZINFORM - Jumysshy mamandyqtar jyly aıasynda Oqý-aǵartý mınıstrligine qarasty Talap kommertsııalyq emes aktsıonerlik qoǵamy tehnıkalyq jáne kásiptik bilim berý júıesiniń aqparattyq kartasyn ázirleýde.
Bul platforma eldegi kolledjder týraly keshendi ári ózekti derekterdi bir tsıfrlyq kartada jáne yńǵaıly formatta usynady.
Interaktıvti karta paıdalanýshyǵa qajetti óńirdi tez tańdaýǵa jáne sol aımaqtaǵy kolledjderdiń, stýdentter men oqytýshylardyń sanyn, jataqhanalar, sport zaldary jáne ózge de nysandar, daıarlyq baǵyttary men mamandyqtar tizimi týraly aqparat alýǵa múmkindik beredi.
Platforma oblystar, aýdandar, naqty kolledjder jáne bilim berý baǵdarlamalary boıynsha ıkemdi júıemen jabdyqtalǵan.
«Búginde mundaı aqparat tek jekelegen platformalarda nemese jergilikti atqarýshy organdardyń saıttarynda ǵana jınaqtalady. Jańa karta el boıynsha barlyq derekterdi biriktirip, ýákiletti organdar úshin de, stýdentter men olardyń ata-analary úshin de paıdaly quralǵa aınalady», - dedi Oqý-aǵartý mınıstrligi Tehnıkalyq jáne kásiptik bilim berý departamentiniń dırektory Áset Muhanbetov.
Qazirgi ýaqytta tehnıkalyq jáne kásiptik bilim berý kartasynyń ózekti nusqasy saıtta ornalastyrylǵan. Pılottyq júıeni iske qosý 2025 jyldyń shilde aıyna josparlanǵan. Júıe «Talap» KEAQ resmı saıtynda jáne map.talap.edu.kz/map mekenjaıy boıynsha qoljetimdi.
Aıta keteıik, jasandy ıntellekt salasynda 25 bilim berý baǵdarlamasy ázirlendi.