Qazaqstanda kásiporyndar sýdy qaıta paıdalanýǵa kóshedi
ASTANA. KAZINFORM – Qazaqstandaǵy ónerkásip kásiporyndary men jylý energııasyn óndirýshi uıymdar sýdy qaıta paıdalaný jáne aınalymdaǵy sýmen jabdyqtaý júıesine kóshýge arnalǵan 168 jospar ázirledi, dep habarlaıdy Sý resýrstary jáne ırrıgatsııa mınıstrligi.
Mınıstrliktiń málimetinshe, ótken jyly qabyldanǵan jańa Sý kodeksine sáıkes ónerkásip kásiporyndary men jylý energııasyn óndirýshi uıymdar sýdy qaıta paıdalaný jáne aınalymdaǵy sýmen jabdyqtaý júıesine kezeń-kezeńimen kóshýge arnalǵan bes jyldyq jospar ázirleýge mindetti. Sonymen qatar qoldanystaǵy sýmen jabdyqtaý júıeleri eń ozyq qoljetimdi tehnologııalardy paıdalana otyryp jańǵyrtylýy tıis.
Qazirgi ýaqytta Sý resýrstary jáne ırrıgatsııa mınıstrligi ónerkásip kásiporyndary men jylý energııasyn óndirýshi uıymdarǵa túgendeý júrgizgen. Sondaı-aq aınalymdaǵy jáne qaıta paıdalanylatyn sýmen jabdyqtaý júıesine kóshý jónindegi josparlardy oryndamaǵan jaǵdaıda ruqsat etiletin sý paıdalaný kólemin qysqartýdy kózdeıtin normatıvtik quqyqtyq aktiler ázirlenip jatyr.
– Barlyq ónerkásip kásiporyndary men jylý energııasyn óndirýshi uıymdar bul josparlardy ázirleýi tıis. Kelesi jyldan bastap bul qujattar arnaıy sý paıdalanýǵa ruqsat alý úshin mindetti talapqa aınalady. Bul sharalar Sý resýrstaryn basqarý júıesin damytý tujyrymdamasynda belgilengen maqsatty kórsetkishterge sáıkes ónerkásip salasynda sýdy qaıta paıdalaný úlesin 28%-ǵa deıin arttyrýǵa múmkindik beredi, – dedi Sý resýrstary jáne ırrıgatsııa mınıstrliginiń Sý saıasaty departamentiniń dırektory Serikjan Beketaev.
Mınıstrliktiń málimetinshe, Qazaqstanda jyl saıyn shamamen 25 mlrd tekshe metr sý tutynylady. Onyń shamamen tórtten biri ónerkásip salasynyń qajettiligine jumsalady.
Aıta keteıik, Qyzylordada 53 jer ýchaskesi men 6 sý aıdyny memleketke qaıtaryldy.
