Qazaqstanda kásipkerlerge arnalǵan AI-navıgator iske qosyldy
ASTANA. KAZINFORM – Qazaqstanda bızneske qoıylatyn zań talaptaryn jasandy ıntellekt kómegimen anyqtaıtyn jańa tsıfrlyq servıs pılottyq rejımde iske qosyldy, dep habarlaıdy Ulttyq ekonomıka mınıstrligi.
Joba Memleket basshysynyń 2025 jylǵy 8 qyrkúıektegi «Jasandy ıntellekt dáýirindegi Qazaqstan» Joldaýyn iske asyrý aıasynda qolǵa alynǵan.
Ulttyq ekonomıka mınıstrligi men Jasandy ıntellekt jáne tsıfrlyq damý mınıstrligi «Kásipkerlik salasyndaǵy mindetti talaptar tizilimi» pılottyq jobasyn iske qosý týraly birlesken buıryqqa qol qoıdy.
Jańa tsıfrlyq servıs kásipkerlerdiń zańnamadaǵy ózekti talaptardy ońaı ári jyldam tabýyna múmkindik beredi. Júıeniń negizinde qoldanystaǵy normatıvtik quqyqtyq aktilerdi avtomatty túrde taldaıtyn jasandy ıntellekt algorıtmderi jatyr.
– Jasandy ıntellekt normatıvtik quqyqtyq aktilerdi taldap, ondaǵy bızneske qoıylatyn talaptardy anyqtaıdy, aqparatty júıeleıdi jáne jańartyp otyrady. Jobanyń negizgi mindeti – kásipkerlerge túsetin ákimshilik júktemeni azaıtý, retteýdiń ashyqtyǵyn arttyrý jáne neǵurlym boljamdy bıznes ortany qalyptastyrý, – delingen mınıstrlik habarlamasynda.
Zańnamany avtomatty túrde taldaý kásipkerlerdiń belgili bir qyzmet túrine qatysty talaptardy óz betinshe izdep, kóptegen normatıvtik qujattardy zertteýge jumsaıtyn ýaqytyn jáne resýrstaryn qysqartýǵa múmkindik beredi.
Mindetti talaptar týraly aqparat qurylymdalyp, kásipkerlerge qoljetimdi formatta usynylady. Bul bıznestiń zańnama talaptaryn jaqsyraq túsinýine jáne belgilengen normalardy baıqaýsyzda buzý táýekelin azaıtýǵa baǵyttalǵan.
Sonymen birge júıe normatıvtik quqyqtyq aktilerge engizilgen ózgeristerdi jedel baqylap, olardy kásipkerlik qyzmette ýaqtyly eskerýge múmkindik beredi.
Pılottyq joba kásipkerlik qyzmetti retteýdi tsıfrlandyrý jáne memleket pen bıznes arasyndaǵy ózara is-qımyl sapasyn arttyrý quraldarynyń biri retinde qarastyrylyp otyr.
Qazirgi ýaqytta jańa fýnktsıonal bızneske arnalǵan tsıfrlyq AI platformasynda qoljetimdi. Jaqyn arada servıs eGov Business portalynda da iske qosylady.
Platforma ázirge pılottyq rejımde jumys isteıdi. Osyǵan baılanysty kásipkerler servısti jetildirýge qatysty usynystaryn Ulttyq ekonomıka mınıstrliginiń Tsıfrlandyrý departamentine joldaı alady.
Aıta keteıik, jasandy ıntellekt memlekettik organdardyń jumysyn eki ese jeńildetedi.
