Qazaqstanda Kaspıı teńiziniń ǵylymı-zertteý ınstıtýty qurylady
ASTANA. KAZINFORM – QR Úkimeti kaspıı teńiziniń ǵylymı-zertteý ınstıtýtyn qurý týraly qaýlyny bekitti - dep habarlaıdy QR Sý resýrstary jáne ırrıgatsııa mınıstriniń baspasóz qyzmeti.
Ǵylymı-zertteý ınstıtýty Kaspıı teńiziniń ekologııalyq, sý deńgeıiniń tómendeý problemasyn, ıtbalyqtar men balyqtardyń jappaı qyrylý sebepterin, Kaspıı ıtbalyqtarynyń popýlıatsııasyn saqtaý máselelerin, ıhtıofaýnany, Kaspıı sý aıdyny men jaǵalaýyn zertteıtin bolady. Sondaı-aq, Kaspıı aýmaǵyndaǵy shekaralas memleketterdegi áriptesterimen ózara tyǵyz is-qımyldy qamtamasyz etetin bolady.
Instıtýt Kaspıı teńiziniń ekojúıesi týraly shynaıy jáne jan-jaqty aqparat beredi. Bul derekter memlekettik jáne jergilikti atqarýshy organdardyń keshendi sharalar qabyldaýyna negiz bolady. Ǵylymı uıym qurý sonymen qatar Kaspııdi saqtaý jónindegi halyqaralyq jáne ulttyq mindettemelerdi tolyq kólemde oryndaýǵa múmkindik beredi.
«Osyǵan deıin Memleket basshysy teńizdi saqtaý maqsatynda Kaspııdi zertteýmen aınalysatyn ǵylymı ınstıtýt qurý jóninde tapsyrma bergen bolatyn. Mundaı uıymdar Kaspıı mańyndaǵy basqa elderde de bar. Instıtýtty qurý bar problemalardy keshendi túrde zertteýge, aýqymdy mindetterdi sheshýge, halyqaralyq yntymaqtastyqty kúsheıtýge múmkindik beredi», - dedi QR Sý resýrstary jáne ırrıgatsııa mınıstri Nurjan Nurjigitov.
