Qazaqstanda qasqyr azaıyp ketken aýmaqtar anyqtalatyn boldy

ASTANA. QazAqparat -  Qazaqstannyń bıoalýantúrlilikti saqtaý qaýymdastyǵy  (QBSQ) qasqyrdy zertteýge qatysty jumysty jalǵastyrýda. Bıyl qaýymdastyq Aqtóbe, Atyraý, Batys Qazaqstan jáne Mańǵystaý oblystarynda ańshylar men jergilikti turǵyndar arasynda saýalnama júrgizedi, dep habarlaıdy QazAqparat qoǵamdyq uıymnyń saıtyna silteme jasap.

Saýalnama barysynda qaýymdastyq turǵyndardyń túrli sanattary arasynda qasqyrǵa degen qarym-qatynasty anyqtaıdy. Buǵan qasqyrdy kórý, jyrtqysh týraly bilý deńgeıi jáne tabıǵatqa degen jalpy kózqarasy áser etedi. 

Sondaı-aq, jergilikti turǵyndar sońǵy jyldarda osy óńirdegi qasqyr sany men ósimine qatysty biletin derekterimen bólisedi. Budan basqa mal sharýashylyǵyna jyrqyshtar qansha shyǵyn keltirgeni de esepke alynady Aıta keterligi elimizde osyndaı málimetter ortalyqtandyrylyp jınastyrylmaıdy.
Saýalnama nátıjesi shekteýsiz aýlaý saldarynan qasqyr sany barynsha azaıyp ketken óńirlerdi anyqtaýǵa kómektesedi. Anketa júrgizý aldaǵy ýaqytta elimizdiń jazyq alqaptarynda qasqyr sanyn retteý tetigin ázirleýge septigin tıgizedi.

Saýalnamany QBSQ mamandary qaýymdastyq klýbtary, fılıaldary arqyly, sondaı-aq, kıik mekendeıtin jerlerge jaqyn turatyn aýyl turǵyndary arasynda aqparattyq naýqan aıasynda da júrgizedi.

Anketa tıimdiligin arttyrý úshin ol anonımdi túrde alynady.
Qazirgi ýaqytta qaýymdastyq 800 anketa taratty. Aldaǵy ýaqytta anketa ǵalamtorda jarııalanady, sol kezde onyń suraqtaryna elimizdegi barlyq qala turǵyndary jaýap bere alady.