Qazaqstanda qasqyr, shıbóri aýlaýǵa ruqsat berildi
ASTANA. KAZINFORM — Elimizde búginnen bastap jyl sońyna deıin qasqyr, shıbórini aýlaýǵa bolady.
— 2025 jyldyń 15 qańtarynan bastap saǵat 10:00–den bastap sanyn retteýge jatatyn janýarlardy (qasqyr, shıbóri) aýlaýǵa ruqsat alý múmkindigi qoljetimdi. Bıologııalyq negizdemege sáıkes janýarlar sanyn retteý merzimi 2025 jylǵy 31 jeltoqsanǵa deıin bekitilgen, — dep habarlaıdy Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti.
Degenmen janýarlar dúnıesi komıteti Aqmola, Batys Qazaqstan, Qaraǵandy, Qostanaı, Mańǵystaý, Pavlodar jáne Ulytaý oblysynda qasqyr men shıbórini atýǵa tek úı janýarlaryna shabýyl jasalǵany dáleldengen jaǵdaıda ǵana ruqsat beriletinin eskertti.
Janýarlar sanyn retteýge ruqsat alý rásimi Qazaqstan Respýblıkasy Ekologııa, geologııa jáne tabıǵı resýrstar mınıstriniń 2020 jylǵy 30 jeltoqsandaǵy № 347 «Sany retteýge jatatyn janýarlar túrlerin alyp qoıýǵa ruqsat berý» memlekettik kórsetiletin qyzmet qaǵıdalaryn bekitý týraly buıryǵymen reglamenttelgen.
Aıta keteıik, elimizde ań aýlaý qyzmeti tolyǵymen (www.elicense.kz veb-portaly) avtomattandyrylǵan.
Eske sala ketsek, aýyldyq jerlerde qasqyrdyń malǵa shabýyl jasaý jaıttary tirkelip turady. Aıtar bolsaq, Atyraý oblysynda sharýa qojalyǵynyń jumysshysyna qasqyr shapty.
Sondaı-aq Aqtóbe oblysy Mártók aýdanynda sharýa qojalyǵyndaǵy malǵa qasqyr shapty.