Qazaqstanda kásipqoı fýtzal lıgasy quryldy
NUR-SULTAN. QazAqparat – Qazaqstanda kásipqoı fýtzal lıgasy quryldy. Mundaı sheshim QR fýtbol federatsııasynyń qabyrǵasynda ótken otyrysta qabyldandy, dep habarlaıdy QazAqparat.
Federatsııanyń baspasóz qyzmetinen málim etkendeı, keńes barysynda elimizde fýtzaldy damytý máselesi talqylandy.
Lıga qurý týraly sheshimdi fýtzaldan OLIMPBET-Qazaqstan chempıonatynyń barlyq klýby biraýyzdan qoldady.
Lıga prezıdenti bolyp Qazaqstan fýtbol federatsııasy fýtzal departamentiniń basshysy Asqar Ábildaev saılandy.
Uıymnyń negizgi qyzmeti fýtzaldan ishki jarystardy uıymdastyrý bolmaq. Olar: OLIMPBET - QR chempıonaty, OLIMPBET - QR kýbogy, OLIMPBET - QR sýperkýbogy, sonymen qatar barlyq jas erekshelikteri boıynsha el birinshilikteri (U-13, U-15, U-17).
Sondaı-aq keńestiń kún tártibinde fýtzaldan Qazaqstan Birinshi lıgasyn qurý jáne jańa maýsymnan bastap fýtzal komandalaryn lıtsenzııalaýdy engizý máseleleri qamtyldy.
