Qazaqstanda kásipqoı bokstan álemdik deńgeıde saıystar ótetindigine senemin - Qanat Islam
ALMATY. QazAqparat-Qazaqstanda kásipqoı bokstan chempıondyq belbeý úshin álemdik deńgeıde saıystar ótetindigine senemin. Keshe Almatyda ótken kásipqoı boks keshi barysynda Beıjiń Olımpıadasynyń qola júldegeri, búginde kásipqoı boksshy Qanat Islam osylaı dedi.
Onyń aıtýynsha, Qazaqstanda osy sekildi boks keshteri jıi uıymdastyrylsa, jas daryndy boksshylar kóptep shyǵatyn bolady.
«Bolashaqta Qazaqstanda kásipqoı bokstan chempıondyq belbeý úshin álemdik deńgeıde saıystar ótetindigine senemin. Búgingi boks keshi sonyń bastamasy dep oılaımyn. Ol joǵary deńgeıde ótti. Alla buıyrsa, osyndaı jarystar jıi uıymdastyrylyp turatyn bolsa, qazaqtyń kók týyn jelbiretetin myqty jigitterdiń shyǵatynyna senemin. Mysaly, búgin 72 keli salmaq dárejesinde sharshy alańǵa shyqqan Aıdos Erbosynulynyń ónerine rıza boldym. Ol artymyzdan kele jatqan inimiz. Kezinde talaı birge jattyqqanbyz. Ol bolashaqta osy salmaq dárejesinde álemniń eń myqty boksshysy bolady dep oılaımyn jáne solaı bolsyn dep tileımin. Tek jaraqat alyp qalmaı, ózin laıyqty daıyndasa deımin. Qazaqtyń kók týyn kóteretin jigittiń biri sol dep oılaımyn», - dedi Q. Islam.
Sonymen qatar, ol bıyl ózi bes kezdesýdi ótkizýdi josparlap otyrǵanyn málimdedi.
«Mende negizi chempıondyq ataqqa talasý saıysy qaldy. Degenmen, bıyl bes kezdesý ótkizýdi josparlap otyrmyz. Solardyń birin Astana qalasynda ótkizsek degen nıetimiz bar. Qazir osy jóninde kelisim-shart jasaý boıynsha kelissózder júrip jatyr. Al daıyndyǵyma keler bolsam, barlyǵy jaqsy. Basqa jumys isteýge ýaqyt ta, mursha da joq. Al, búgingi boks keshine qatysqanyma óte qýanyshtymyn», - dedi Q. Islam.
Aıta ketelik, Qanat Islam búginde birinshi jartylaı salmaqta WBA Fedecaribe belbeýiniń ıegeri.
