Qazaqstanda kásipkerlik eń jaqsy damyǵan óńirge «Han Táńiri» syılyǵy beriledi
Qoǵamdyq keńes otyrysy vedomstvo basshysy Tımýr Súleımenovtiń tóraǵalyǵymen ótti. Kezekti kezdesý bıznesti júrgizýdiń jeńildigi jónindegi óńirlerdiń reıtıngin engizýge arnaldy.
Ulttyq ekonomıka vıtse-mınıstri Serik Jumanǵarın otyrysqa qatysýshylardyń aldynda negizgi baıandama jasady. Ol Memleket basshysynyń tapsyrmasyn oryndaý úshin QR Ulttyq ekonomıka mınıstrligi 2017 jylǵy maýsymda «Qazaqstan Respýblıkasynyń óńirlerinde bıznesti júrgizýdiń jeńildigi jónindegi reıtıngti ázirleý jáne engizý» jobasyn bastaǵandyǵyn eske saldy.
«Joba aıasynda eldik jáne elaralyq deńgeıde bıznes ortany zertteýge baǵyttalǵan álemdik analogtardyń tájirıbesi negizinde Bıznesti júrgizýdiń jeńildigi jónindegi reıtıng ádistemesi ázirlenip, bekitildi. Reıtıng ádistemesine sáıkes baǵalaý eki: óńirlik - 14 oblys pen Astana jáne Almaty qalalaryn jáne qalalyq deńgeıde - 55 qalany salystyrý arqyly júrgizilmek», - dedi Jumanǵarın.
Onyń aıtýynsha, óńirler men qalalardaǵy bıznesti júrgizý shartyn baǵalaýdyń negizgi baǵyttary retteýshilik ahýal, bızneske qarjynyń qoljetimdiligi, adamı kapıtal, bıznestiń ınfraqurylymy, qabyldanǵan sheshimderdiń ashyqtyǵy bolyp tabylady. Reıtıng resmı statıstıka málimetteri negizinde de, sýbektıvtik saýalnama derekteri negizinde de ótkiziledi.
«Búginde zertteýler aıaqtaldy, 10 myńnan asa respondentpen (onyń 8120-sy kásipker jáne 2100-i bolashaq kásipkerler) saýalnama júrgizildi. Bıznes-qoǵamdastyq ókilderimen júrgizilgen saýalnama qorytyndysy boıynsha Ekonomıkalyq zertteýler ınstıtýty bıznes-ortaǵa taldaý jasady», - dedi Jumanǵarın bıznesti júrgizýdiń jeńildigi jónindegi óńirler men qalalardyń reıtınginiń nátıjeleri Indýstrııalandyrý kúninde habarlanatyndyǵyn aıta kelip.
Kásipkerliktiń damýyna úles qosqan qalalar men óńirler «Han Táńiri» syılyǵyna usynylatyn bolady. Reıtıng bıznes-ahýaldy jaqsartý jónindegi reformalardy tájirıbede anaǵurlym belsendi túrde júzege asyratyn jáne qoldanatyn óńirler men qalalardyń pozıtsııasyn anyqtaıtyn tolyqqandy tetik bolatyndyǵy boljanýda.
Otyrysqa qatysýshylar tutas alǵanda, baıandamany maquldap, qorytyndy hattamaǵa qol qoıdy. Olar sondaı-aq mundaı jobalardy Qoǵamdyq keńestiń aıasynda talqylaý memlekettik sheshimderdi qabyldaýdyń aıqyndyǵyn arttyratyndyǵyn atap ótti.
Ulttyq ekonomıka mınıstrliginiń Qoǵamdyq keńesiniń quramynda Qazaqstannyń salyq tóleýshiler qaýymdastyǵy keńesiniń basqarýshy tóraǵasy Jannat Ertilesova, «Qazaqstan ekonomısteriniń qaýymdastyǵy» Qoǵamdyq qory Qamqorshylyq keńesiniń tóraǵasy Oraz Jandosov, «Almaty halyqaralyq áýejaıy» AQ Dırektorlar keńesiniń tóraǵasy Ánýar Seıdenov jáne basqalar bar.
