Qazaqstanda kásipkerlerdiń start-ap jobalary basym tártippen qaralady - Úkimet saǵaty
Bul týraly búgin Májilistegi Úkimet saǵatynda elimizdiń Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Nátıjeli jumyspen qamtý jáne jappaı kásipkerlikti damytý baǵdarlamasy aýylda, sol sııaqty qalalarda kásipkerlik áleýetti damytýǵa, jeke isin ashýǵa jáne júrgizýge jaǵdaı jasaıdy. Jappaı kásipkerlikti damytýdy yntalandyrý úshin mıkrokredıtteý kólemderi keńeıtildi, áleýetti kásipkerlerdiń kepildi qamtamasyz etýiniń jetkiliksizdigi kezinde memleket tarapynan kepildik berý múmkindigi usynylady. Bul sharalar aýyldaǵy qarjylandyrýdyń jetispeýshiligimen jáne kepildi qamtamasyz etýdiń jetkiliksizdigimen baılanysty máselelerdi sheshýge baǵyttalǵan», - dedi ol.
Onyń aıtýynsha, baǵdarlama aıasynda mıkrokredıtter túpkilikti syıaqy mólsherlemesi 6 paıyzdan asyrylmaı 8 myń AEK-ke (17 mln.teńge) deıin beriledi.
«Nesıe berý naryǵynda mıkrokredıtterdiń quny 22 paıyzdan 35 paıyzǵa deıin quraıtynyn eskeretin bolsaq, baǵdarlama aıasyndaǵy mıkrokredıtter bıznes jobany iske asyrý úshin anaǵurlym paıdaly usynys bolyp tabylady. Qalalarda mıkrokredıtter «Damý» KDQ» AQ arqyly, aýyldyq eldi mekender men shaǵyn qalalarda «Agrarlyq kredıttik korporatsııa» AQ arqyly beriletin bolady», - dedi mınıstr.
Súleımenovtiń sózine qaraǵanda, alǵash ret kásipkerlik qyzmetti mıkrokredıtteý memleket tarapynan kepildik berýmen bekitildi. Bul jumyssyz jáne nátıjeli jumyspen qamtylmaǵan halyqtyń kepil máselesiniń sheshimi bolyp sanalady. Kepildik jumys istep turǵan bıznes úshin mıkrokredıt qunynyń 50 paıyzyna deıin jáne jumysyn jańa bastaǵan kásipkerler úshin 85 paıyzyna deıin beriletin bolady. Qalalarda memleket atynan «Damý» KDQ» AQ, aýyldy eldi mekenderde «QazAgroKepilger» AQ kepilgerler bolyp tabylady. Bul rette, kásipker defolt bolǵan jaǵdaıda, kepildikti tóleý boıynsha táýekeldiń negizgi bóligi kepildik berý jónindegi operatorlarǵa júkteledi. Memleket kepildik berý qunynyń 30 paıyzyna deıin tóleıdi. Bul operatorlardy kelip túsetin ótinimderdi sapaly taldaýǵa yntalandyrady jáne tıimsiz jobalarǵa qoldaý kórsetýdi azaıtýǵa múmkindik beredi.
«Kásipkerlik qyzmetti mıkrokredıtteýge jyl saıyn qalalarda 10 mlrd. teńge, aýyldyq jerlerde - 27 mlrd. teńge, qalalarda mıkrokredıtterge kepildik berýge - 1,2 mlrd. teńge, aýyldyq jerlerde - 2,8 mlrd. teńge kózdeledi. Bul, qalalarda 2 500-den astam jobany qarjylandyrýǵa, formaldy ekonomıkaǵa aýyldar men shaǵyn qalalardaǵy 16 myńnan astam jeke qosalqy sharýashylyqtardy kóshirýge, jetispeıtin kepildi qamtamasyz etýmen 1 250-den astam jobalardy qamtamasyz etýge múmkindik beredi. Bul rette baǵdarlama ındıkatıvterine sáıkes, úlesi keminde 20 paıyzdy quraıtyn kásipkerlerdiń start-ap jobalary basym tártippen qaralatyn bolady», - dedi Súleımenov.
