Qazaqstanda kásipkerlerdiń alǵashqy respýblıkalyq saýalnamasy bastaldy
PETROPAVL. QazAqparat - Qazaqstanda kásipkerlerdiń alǵashqy respýblıkalyq saýalnamasy bastaldy. Shara el boıynsha túrli deńgeıdegi 1 mln 200 myńnan astam bıznes nysanyn qamtymaq, dep habarlaıdy QazAqparat tilshisi.
Jobanyń maqsaty - kásipkerlermen baılanys ornatyp, olardyń máselelerin oblystyq jáne respýblıkalyq deńgeılerde sheshý. Ózekti máselelerdi saýalnama barysynda «Atameken» kásipkerler palatasynyń suhbat alýshylaryna jetkizip, «Atameken Services» qosymshasyna da júkteýge bolady. Budan basqa qosymshada tegin bilim alyp, qarjylyq, quqyqtyq jáne taýar ótkizý máseleleri boıynsha paıdaly aqparat bar. Jańartylǵan platforma qazirdiń ózinde kásipkerler arasynda úlken qyzyǵýshylyq týdyrýda.
Soltústik Qazaqstan oblysynda saýalnama eki kezeńde ótedi. Birinshi kezekte kásipkerler palatasynda telefon nómirleri barlarǵa qońyraý shalynyp, derekter jınalady. Qalǵandaryna ıntervıýerler ózderi baryp, jaýap alady.
«Meniń oıymsha, bul saýalnama kásipkerlerge óz máselesin jarııalaýda taptyrmas múmkindik. Biz mekteptermen jumys isteımiz, memlekettik tapsyrysty oryndaımyz. Óz máselemizdi kelip aıtýǵa ýaqytymyz bola bermeıdi. Qazir call-ortalyqtanqońyraý kútip otyrmyz», - deıdi «Volkova» JK dırektory Olga Volkova.
Oblysta 29 myńǵa tarta kásipker bar. Mamandardyń aıtýynsha, saýalnamany ótkizýge arnaıy 22 maman tartylǵan. Buǵan qosa, palatanyń aýdandardaǵy 13 fılıaly da jumyldyrylady. Jalpy, saýalnamany SQO-da mamyrdyń birine deıin aıaqtaý josparlanǵan.
