Qazaqstanda kásipkerler úshin SEQ talaptary 85 paıyzǵa qysqartylady

ASTANA. QazAqparat - Ulttyq ekonomıka mınıstrliginde Kásipkerlik máseleleri jónindegi saraptama tobynyń kezekti otyrysy ótti, onda bıznestiń memlekettik organdardyń baqylaý-qadaǵalaý qyzmetimen baılanysty shyǵyndaryn qysqartý boıynsha aralyq jumys nátıjeleri qaraldy, dep habarlaıdy QR Ulttyq ekonomıka mınıstrliginiń baspasóz qyzmeti.            

Negizinen, Saraptama toby QR Densaýlyq saqtaý mınıstrliginiń Qoǵamdyq densaýlyqty qorǵaý komıtetimen birigip tekserý paraqtarynyń talaptaryn ońtaılandyrý boıynsha jumys júrgizdi.

«Búginde kásipkerlerge 83 sanıtarlyq qaǵıdadan taraıtyn 14000-ǵa jýyq talap qoıylady. Saraptama toby barlyq talaptarǵa muqııat taldaý júrgizdi jáne olardy ońtaılandyrý boıynsha usynymdar ázirledi, nátıjesinde SEQ salasyndaǵy tekserý paraqtarynyń talaptary 85 paıyzǵa, ıaǵnı 14000-nan 1700 talapqa qysqardy. Tekserý paraqtaryn bekitetin tıisti birlesken buıryqqa ulttyq ekonomıka jáne densaýlyq saqtaý mınıstrleri qol qoıdy», - dedi QR UEM Kásipkerlikti damytý departamenti dırektorynyń orynbasary Aslanbek Jaqypov Kásipkerlik máseleleri jónindegi saraptama tobynyń otyrysynda.

Saraptama toby músheleriniń pikirinshe, qabyldanyp jatqan sharalar bızneske ákimshilik júktemeniń tómendeýine jáne kásipkerler shyǵyndarynyń qysqarýyna járdemdesedi.

Sondaı-aq Ulttyq ekonomıka mınıstrligi kásipkerlik qyzmetti retteýdi jetildirýge baǵyttalǵan zań jobasyn ázirlep jatyr.

Aslanbek Jaqypovtyń aıtýynsha, talaptar sanynyń qysqarýymen birge joǵaryda atalǵan zań jobasy aıasynda qoldanystaǵy jedel jazalaý sharalarynyń ornyna eskertý-túsindirý sıpatyndaǵy sharalarǵa aýysý eskeriledi.

«Kásipkerlerge zańnamana talaptaryn saqtaýǵa kómek kórsetý qajet ekenin túsingenimiz jón. Kóbinese, kásipkerdiń zań normalaryn buzǵysy kelgendiginen emes, onyń oryndalý tártibin nemese múlde onyń bar ekenin bilmeýi saldarynan belgili bir zań buzýshylyq anyqtalady. Osyǵan baılanysty, tekserýlerdiń kópshiligi, onyń ishinde SEQ organdarymen iske asyrylatyn tekserýler aldyn alý baqylaýǵa aýystyrylady. Munyń mánisi, zań buzýshylyq anyqtalǵan jaǵdaıda qoldanystaǵy dereý jazalaý daǵdysynyń ornyna quqyqbuzýshylyqtyń aldyn alý jáne túzetý joldary túsindirilmek» - dedi Aslanbek Jaqypov.     

Kásipkerlik máseleleri jónindegi saraptama toby Premer-Mınıstrdiń birinshi orynbasarynyń sheshimimen qurylǵan jáne UEM, «Atameken» UKP, bıznes-qoǵamdastyq jáne ǵylymı uıymdar ókilderinen turady. Saraptama tobynyń negizgi mindeti kásipkerlik qyzmettiń normatıvtik rettelýin jetildirý boıynsha usynymdar ázirleý bolyp tabylady.