Qazaqstanda qashyqtan oqytýdy resmı zańdastyrý usynyldy
Bul usynysty Ulttyq qoǵamdyq senim keńesiniń múshesi Raýan Kenjehanuly aıtty.
«Bilim berýdiń sapasyn arttyryp, ári ony bar aımaqta qoljetimdi etý úshin qashyqtan jáne onlaın oqytý tehnologııalaryn júıeli túrde jáne keńinen engizý suranyp tur. Sońǵy 10 jylda álem boıynsha qarqyndy damyǵan bul tehnologııalar óz tıimdiligin dáleldedi. Ásirese, jahandyq karantın saldarynan jappaı qashyqtan oqytýǵa kóshý bul ádisterdiń zor múmkindikterin kórsetti. Árıne, mektep jáne kolledjderdi, JOO-ny tolyq onlaınǵa ótkizý mindeti turǵan joq. Bul múmkin de emes», - dep atap ótti spıker Ulttyq qoǵamdyq senim keńesiniń onlaın formattaǵy 3-otyrysynda.
Degenmen, ár oqýshynyń jeke qabileti men múmkindikterin eskere alatyn, sol arqyly oqytýdyń tıimdiligin arttyratyn tehnologııalardy bilim berýge qazirdiń ózinde engizýge bolady.
«Ol úshin aldymen qashyqtan oqytýdy Qazaqstanda resmı túrde tanylǵan bilim berý formasy qataryna qosyp, ony Bilim týraly zańǵa kirgizý qajet dep oılaımyz. Qashyqtan oqytý tehnologııasyn qoldanatyn oqý oryndaryna qoıylatyn ádistemelik jáne tehnologııalyq talaptardy aıqyndap, olarǵa bólek lıtsenzııa bergen abzal. Bul másele shuǵyl sheshilmese, óz elinde otyryp, sheteldik oqý platformalaryn tańdaıtyn qazaqstandyq qashyqtan oqýshylar kóbeıedi. Qazirdiń ózinde bizdiń esebimizshe 30 myńnan astam qazaqstandyq oqýshylar ıen stýdentter qazaqstandyq baǵdarlama, standart pen talapty múldem eskermeıtin sheteldik onlaın mektep pen ýnıversıtetterde oqyp jatyr. Bul máselege qatysty usynystar men zańǵa enýi qajet tolyqtyrýlar men ózgerister jobasyn mınıstrlikke tapsyrdyq», - dedi R. Kenjehanuly.
Buǵan deıin Raýan Kenjehanuly Qazaqstan mektepterin bir aýysymda oqý rejımine kóshirý joldaryn aıtty jáne Qazaqstanda ulttyq mektep úlgisin jasaýdy usyndy.
