Qazaqstanda qarjy rezervi jetkilikti – Prezıdent
NUR-SULTAN. QazAqparat - Bizde qarjy rezervi jetkilikti jáne memleket qaryzynyń kólemi múmkindigimizge oraılas.
Bul týraly Memleket basshysy Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda málim etti, dep habarlaıdy QazAqparat.
«Jumys barysynda olqylyqtardyń bolǵanyn da moıyndaýymyz kerek. Іndet kóp taralyp, ekonomıkalyq máseleler qatty ýshyǵyp ketkeni ras. Soǵan qaraı, biz der kezinde shuǵyl sharalar qabyldadyq. Kóptegen másele qoǵam ókilderiniń belsene qatysýy arqyly sheshildi. Bul «Halyq únine qulaq asatyn memleket» tujyrymdamasyn júzege asyrýdyń mańyzdy kezeńine aınaldy. Koronavırýs pandemııasy álemdik retsessııanyń bastalýyna sebep boldy. Tipti uzaqqa sozylatyn ekonomıkalyq daǵdarysqa da alyp kelýi ábden múmkin», - dedi Memleket basshysy.
Prezıdenttik atap ótýinshe, álemdegi eńbekke jaramdy halyqtyń jartysyna jýyǵynyń tabysy azaıdy.
«Jer-jerde protektsıonızmniń kúsheıýi beleń alýda. Ekonomıkanyń tutas salalary toqyraýǵa ushyrap jatyr. 400 mıllıonnan astam kásiporyn bankrot bolýdyń aldynda tur. Álemdegi eńbekke jaramdy halyqtyń jartysyna jýyǵynyń tabysy azaıdy. Sarapshylar jahan ekonomıkasy sońǵy júz jyl ishinde bolmaǵan deńgeıge túsetinin boljap otyr. Osyndaı jaǵdaıǵa qaramastan, elimiz birqatar basymdyqqa ıe bolyp otyrǵanyn aıtqym keledi. Bizde qarjy rezervi jetkilikti jáne memleket qaryzynyń kólemi múmkindigimizge oraılas. Eń bastysy, biz jańa ahýal jaǵdaıynda jumyspen qamtamasyz etý jáne ekonomıkalyq tıimdilikti arttyrý úshin resýrstardy qaıda jumsaý kerektigin bilemiz. Eń bastysy, barsha azamattardyń ómiri men densaýlyǵyn saqtaý. Azamattardyń tabysyn arttyrý. Bıznesti qoldaý jáne ony damytý. Bilim jáne ǵylym júıesin jetildirý», - dedi Qasym-Jomart Toqaev.
