Qazaqstanda qarjy naryǵyn retteıtin reforma paketi ázirlenip jatyr
ASTANA. KAZINFORM – Ulttyq bank pen Qarjy naryǵyn retteý jáne damytý agenttigi otandyq qarjy naryǵyna reforma júrgizbek. Bul týraly Ulttyq bank tóraǵasy Tımýr Súleımenov málim etti.
- Memleket basshysynyń tapsyrmasyna sáıkes bıyl Qarjy naryǵyn retteý jáne damytý agenttigimen birlesip qarjy zańnamasyn reformalaý paketin daıyndap jatyrmyz. Zańnamada bank sektory, tólemder, baǵaly qaǵazdar naryǵy jáne basqa da máseleler qamtylady. Sondaı-aq tsıfrlyq qarjy aktıvterin retteý, ulttyq tsıfrlyq qarjy ınfraqurylymyn engizý jáne tólem naryǵyn odan ári damytý máselelerin de josparlap otyrmyz, - dedi Tımýr Súleımenov Úkimet otyrysynda.
Onyń málimdeýinshe, elimizdiń makroekonomıkalyq turaqtylyǵy men damýyn qamtamasyz etý úshin Memleket basshysynyń reformalaryn júıeli túrde iske asyrý jumysy jalǵasady.
- Uzaqmerzimdi, sapaly jáne ınklıýzıvti ekonomıkalyq ósimge, azamattardyń ál-aýqatyn jaqsartýǵa jaǵdaı jasaý maqsatynda baǵa men qarjy turaqtylyǵyna basa nazar aýdarylady, - deıdi Ulttyq bank tóraǵasy.
Buǵan deıin Ulttyq bank ınflıatsııamen qatań aqsha-kredıt saıasatyn júrgizý arqyly kúresetini týraly habarlaǵan edik.
Aıta keteıik, búgin Úkimet 2026-2028 jyldarǵa arnalǵan áleýmettik-ekonomıkalyq damý boljamyn jáne 2035 jylǵa deıingi uzaq merzimdi damý boljamyn maquldady.