Qazaqstanda qarý-jaraqty ákelý men áketýge qoıylatyn talaptar ózgerdi
ASTANA. KAZINFORM – Іshki ister mınıstriniń 2026 jylǵy 25 mamyrdaǵy buıryǵymen azamattyq jáne qyzmettik qarý-jaraq pen oǵan arnalǵan patrondardyń aınalymy salasynda ekinshi sanattaǵy ruqsattardy berý kezinde qoıylatyn talaptarǵa jáne olardy rastaıtyn qujattar tizbesine ózgerister engizildi.
Atap aıtqanda, Qazaqstan aýmaǵyna azamattyq jáne qyzmettik qarý-jaraq pen patrondardy ákelýge, el aýmaǵynan áketýge jáne respýblıka arqyly tranzıtpen ótkizýge qorytyndy berý kezinde qoldanylatyn birqatar talap pen qujattar tizbesi qaıta qaraldy.
Jańa talaptarǵa sáıkes, qujattarda qarý men patrondardyń sany, olardy ákelýge nemese áketýge jaýapty tulǵanyń jeke basyn kýálandyratyn qujat derekteri, qarý men patrondar ákelinetin memleket, sondaı-aq olar ótkiziletin keden pýnkti nemese shekaradan ótkizý pýnkti týraly málimetter kórsetilýi tıis.
Sondaı-aq úshinshi eldermen saýdada tarıftik emes retteý sharalary qoldanylatyn taýarlardy ákelýge, áketýge jáne tranzıtpen ótkizýge arnalǵan biryńǵaı qorytyndy nysanyna sáıkes rásimdelgen qorytyndy jobasy usynylýy qajet.
Qarý men patrondarǵa qol jetkize alatyn adamdardyń ótelmegen nemese zańda belgilengen tártippen alynbaǵan sottylyǵy bolmaýy tıis. Sonymen qatar olar zańnamada kórsetilgen birqatar qylmystyq jáne ákimshilik quqyq buzýshylyqtardy jasamaǵan bolýy kerek.
Budan bólek, qarýǵa qol jetkize alatyn adamdar ekstremızmge, terrorızmge nemese uıymdasqan qylmysqa qarsy is-qımyl baǵyty boıynsha ishki ister jáne ulttyq qaýipsizdik organdarynyń esebinde turmaýǵa tıis.
Zańdy tulǵalar úshin memlekettik baj tóleý mindeti saqtalady.
Qarý men patrondardyń zańsyz qaıta jasalýyna jol bermeý úshin olardyń krımınalıstıkalyq talaptar men synaq ádisterine sáıkestigi rastalýy qajet. Sondaı-aq qarý men patrondardy Qazaqstan aýmaǵyna ákelgennen keıin tıisti synaqtan ótkizý týraly shart usynýǵa bolady. Bul talap ýaqytsha ákelý nemese áketý jaǵdaılaryna qoldanylmaıdy.
Sonymen qatar ótinish berýshiniń azamattyq jáne qyzmettik qarý-jaraq pen oǵan arnalǵan patrondar saýdasyn júrgizýge quqyǵy bolýy tıis.
Qujatqa ózge de ózgerister engizilgen.
Buıryq 2026 jylǵy 12 shildeden bastap kúshine enedi.
Eske salaıyq, buǵan deıin Іshki ister mınıstrligi jyl basynan beri elde zańsyz aınalymnan 900-den astam qarý tárkilengenin habarlaǵan bolatyn.
