Qazaqstanda qarý-jaraq dúkenderiniń jumysyna qoıylatyn talaptar kúsheıedi - Nurtaı Sabılıanov
«Qazir Parlament Májilisinde «Qazaqstan Respýblıkasynyń keıbir zańnamalyq aktilerine ekstremızm jáne terrorızm máseleleri boıynsha ózgerister men tolyqtyrýlar engizý týraly» zań jobasy jan-jaqty talqylanyp jatyr. Qujattyń tanystyrylymynda birqatar saýaldar qoıylyp, qajetti usynystar jasaldy. Sol usynystyń bári jumys tobynda talqylanýda. Zań jobasy arqyly qandaı ózgerister bolýy múmkin? Birinshiden, ekstremızm men terrorızmge baılanysty qylmystyq jaýapqa tartý, ıaǵnı bas bostandyǵynan aıyrý merzimi ulǵaıtylýda. Óıkeni, bul aýyr qylmystar bolǵandyqtan, osyndaı usynystar eskerilip otyr»,-dedi depýtat «QazAqparatqa» bergen suhbatynda.
Budan bólek, N. Sabılıanov qarý-jaraq aınalymyna qatysty ony saqtaý tártibin kúsheıtetin normalar qamtylǵanyn atap ótti. Máselen, onyń aıtýynsha, qyzmettik qarý-jaraqtyń, oq-dárilerdiń aınalymyn baqylaý baǵytynda erekshe tártip ornatylmaq. Sosyn jalpy qarý-jaraq dúkenderiniń jumysyna qoıylatyn talaptar kúsheıedi.
«Máselen, turǵyn úılerde, sporttyq jáne oıyn-saýyq ǵımarattarynda, bilim berý men densaýlyq saqtaý nysandarynda, qoǵamdyq ǵımarattarda qarý men onyń oq-dárilerin saqtaýǵa tyıym salynyp otyr. Ekstremızm jáne terrorızmge yqpal etetin dinı toptar men birlestikter qyzmetine tyıym salý da qarastyrylady. Bul baǵyttaǵy usynystar talqylanýda. Sonymen qatar bizde ekstremızm men terrorızmge qarsy arnaıy jedel-izdestirý sharalaryn júrgizý tártibi qazirgi kezde jeńildetilip otyr. Óıtkeni, aldyn alý sharalary aldaǵy ýaqytta jaqsy nátıje beredi degen oıdamyz»,-dep atap ótti halyq qalaýlysy.
Tutastaı alǵanda, depýttar jumys tobynyń aıasynda zań jobasyn odan ári jetildirýmen aınalysyp jatyr. «Bul qoǵamǵa kerek zańnama. Barlyǵymyz osy zań jobasyn qoldap otyrmyz. Meniń oıymsha, osy baǵyttaǵy jumystar arqyly ekstremızm jáne terrorızmge qarsy kúres pen oǵan qatysty qadamdar túbegeli retteledi», - dep túıindedi sózin N. Sabılıanov.
