Qarttar kúnine oraı 274 myń adamǵa 3,8 mlrd teńge kómek kórsetiledi
ASTANA. KAZINFORM - Qarttar kúnine oraı Qazaqstannyń birqatar óńirinde 274,2 myń adamǵa jalpy somasy 3,8 mlrd teńgeni quraıtyn birjolǵy materıaldyq kómek kórsetiledi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Atap aıtqanda, Astana qalasyndaǵy, Ulytaý, Pavlodar jáne Aqmola oblystaryndaǵy zeınetaqysy eń tómengi mólsherde jáne odan tómen mólsherde alýshylarǵa, Mańǵystaý oblysyndaǵy jáne Shymkent qalasyndaǵy 70 jastan asqan adamdarǵa, Qaraǵandy oblysyndaǵy 75 jastan asqan adamdarǵa, Túrkistan oblysyndaǵy úıde arnaýly áleýmettik qyzmetter alatyn jalǵyzbasty qart adamdarǵa kómek beriledi.
Jalpy, 2026 jyly shamamen 120 myń qart azamatty áleýmettik qoldaýǵa 6,6 mlrd teńgeden astam qarajat baǵyttaldy. Qarajat qatty otyn satyp alýǵa, turmystyq jáne kommýnaldyq shyǵyndaryn óteýge, dári-dármek alýǵa, emdelýge, saýyqtyrýǵa, sanatorıı-kýrorttyq em alýǵa jáne basqa da áleýmettik kómek túrlerine jumsalady.
Jyl saıyn 1 qazan kúni álemniń kóptegen elderinde, sonyń ishinde Qazaqstanda da Halyqaralyq qarttar kúni atalyp ótedi. Elimizde jasy boıynsha zeınetaqy alatyn 2,6 mıllıonǵa jýyq azamat bar.
Memleket tarapynan aǵa býyn ókilderin áleýmettik qorǵaý, zeınetaqymen qamsyzdandyrý júıesin jetildirý jáne olardyń belsendi ómir súrýine jaǵdaı jasaý boıynsha turaqty jumys júrgizilýde.
2026 jyldyń 1 qańtarynan bastap yntymaqty zeınetaqy mólsheri 10%-ǵa artty. Sonymen qatar kúnkóris deńgeıiniń ózgerýine baılanysty bazalyq zeınetaqy mólsheri de ulǵaıtyldy.
Memleket basshysynyń tapsyrmasyna sáıkes bazalyq zeınetaqyny kezeń-kezeńimen arttyrý jalǵasyp keledi. Bıyl bazalyq zeınetaqynyń eń tómengi mólsheri eń tómengi kúnkóris deńgeıiniń 70%-yna deıin, al eń joǵary mólsheri 110%-dan 118%-ǵa deıin jetkizildi.
Eńbek jáne halyqty áleýmettik qorǵaý mınıstrligi aǵa býyn ókilderiniń áleýmettik jaǵdaıyn jaqsartýmen qatar, olardyń belsendi ómir súrýine jáne qoǵam ómirine aralasýyna da erekshe kóńil bóledi.
Búginde elimizde 132 Belsendi uzaq ómir súrý ortalyǵy jumys isteıdi. Ortalyqtar «bir tereze» qaǵıdaty boıynsha belsendi uzaq ómir súrý, densaýlyq mádenıeti jáne qoǵammen baılanys baǵyttarynda qyzmet kórsetedi.
Munda qart adamdardyń bos ýaqytyn tıimdi ótkizýine, densaýlyǵyn nyǵaıtýyna jáne jańa daǵdylardy meńgerýine jaǵdaı jasalǵan. Atap aıtqanda, ıoga, skandınavııalyq júris, tsıfrlyq saýattylyq, aǵylshyn tili, motıvatsııalyq jáne kásipkerlik kýrstar uıymdastyrylady.
Qart adamdardy qoldaý – áleýmettik qorǵaý júıesiniń turaqty baǵyttarynyń biri. Bul jumys zeınetaqymen qamsyzdandyrýmen shektelmeı, aǵa býyn ókilderiniń turmys sapasyn jaqsartýǵa, densaýlyǵyn saqtaýǵa, belsendi ómir súrýine jáne qoǵamnyń tolyqqandy múshesi retinde óz áleýetin júzege asyrýyna jaǵdaı jasaýǵa baǵyttalǵan.
Osyǵan deıin qarttar sany eń kóp óńirlerdi atadyq.
