Qazaqstanda kartop tapshylyǵy bolýy múmkin be — Vıtse-mınıstr jaýaby
ASTANA. KAZINFORM — Bıyl sharýashylyqtardaǵy kartop egý alqaby 5,5 myń gektarǵa kóbeıdi. Osylaısha ishki naryqtaǵy qajettilikti tolyq jabý kózdelgen. Bul týraly QR Aýyl sharýashylyǵy vıtse-mınıstri Nazgúl Hatepova málimdedi.
Onyń aıtýynsha, Qazaqstanda jylyna 2 mln kartopqa ishki qajettilik bar. Byltyr elde 2,8 mln tonna kartop jınalsa, bıyl da osy deńgeıdegi ónim alý kútilip otyr.
— Kartopty saqtaý boıynsha da qajetti ınfraqurylym bar. Qyrkúıek aıyndaǵy jaǵdaı boıynsha elimizde 956 kókónis qoımasy bar. Olardyń jalpy syıymdylyǵy — 2,6 mln tonna, ıaǵnı óndiriletin kartop kólemin tolyq saqtaýǵa múmkindik bar. Kartop eksportynda da elimizdiń áleýeti de saqtalyp otyr, ónimdi ótkizý naryqtary jetkilikti, — dedi Nazgúl Hatepova Úkimet úıinde ótken baspasóz máslıhatynda.
Sonymen birge, ishki naryqta kartop ımportynyń bolýyn vıtse-mınıstr maýsymaralyq kezeńmen baılanystyrdy.
— Keler jyldyń mamyr-maýsym aılarynda, ıaǵnı qoımalardaǵy qor azaıǵanda kartop ımporty oryn alady. Biraq osy ýaqytta Túrkistan jáne Almaty oblystarynda erte pisetin kartop shyǵa bastaıdy. Maýsymaralyq kezeńdegi ishki naryq qajettiligin jabý úshin osy kartop alqaptary saıyn ulǵaıtylyp keledi, — dedi N. Hatepova.
Buǵan deıin Kólik vıtse-mınıstri Jánibek Taıjanov Qazaqstan astyǵy qaı elderge kóbirek eksporttalatynyn aıtqan edi.
Astyq eksportyn ulǵaıtý úshin poıyz ótkizý qabileti de kúsheıip keledi.
