Qazaqstanda kartop klasterin qurýǵa 13 mlrd. teńge bólinedi
ASTANA. QazAqparat - Qazaqstanda kartop klasterin qurýǵa 13 mlrd. teńge bólinedi. Bul týraly búgin QR Parlamenti Májilisiniń jalpy otyrysynda «2016-2018 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» QR Zańynyń jobasyn talqylaý barysynda depýtattar saýalyna jaýap bergen QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov málim etti.
Depýtat Murat Temirjanovtyń aıtýynsha, mınıstrlik respýblıkalyq bıýdjetten kartop ósirý jáne ony óńdeý boıynsha úsh jobadan turatyn klaster qurý úshin 13 mlrd. teńge qarajat almaq. «Aıtyńyzshy, nege kartop? Ony ósirýge jáne ony óńdeýge qansha aqsha ketedi? Jobalar qaı óńirlerde júzege asyrylady?», - dep surady depýtat mınıstrden.
«Birinshiden mynany aıtym keledi. Aýyl sharýashylyǵy salasyna bólinip otyrǵan qarjy - 97,3 mlrd. teńge. Onyń 51 mlrd. teńgesi «QazAgro» arqyly nesıege berýge josparlanyp otyr. 51 mlrd. teńgeniń 14 mlrd. teńgesi Elbasy tapsyrmasyna sáıkes qosalqy sharýashylyqtardy qoldaýǵa bólinedi», - dep atap ótti ol.
Osydan keıin mınıstr kartop klasterin qurý eń aldymen ishki naryqty qamtamasyz etýge baılanysty qolǵa alynǵanyn jetkizip, onyń qaı óńirlerde júzege asyrylatyndyǵyn naqty atady.
«Búgingi tańda kartop ósirý Qazaqstannyń Pavlodar, Soltústik Qazaqstan, Aqmola, Qaraǵandy oblystarynda óte jaqsy jolǵa qoıylǵan. Sonymen birge logıstıkany eskere otyryp, basqa da oblystarǵa tıimdi bolsa, sol óńirlerdiń ishki naryǵyn qamtamasyz etý úshin eskeremiz», - dedi A.Myrzahmetov.
