Qazaqstanda kartop eksporty 18,5 paıyzǵa ósti

ASTANA. QazAqparat - 2022 jyly jalpy jınalǵan kartop ónimi 40 804 697,5 tsentnerdi nemese 4,1 mln tonnany qurady, bul 2021 jylmen salystyrǵanda 1,2%-ǵa kóp, dep habarlaıdy QazAqparat ulttyq statbıýroǵa silteme jasap.

Onyń ishinde aýyl sharýashylyǵy kásiporyndary 588 myń tonna ónim óndirdi. Jeke kásipkerler men sharýa nemese fermer qojalyqtary – 1,5 mln tonna, al úı sharýashylyqtarynyń úlesinde ótken jyly 1,9 mln tonna ónim boldy.

Óndiris kóleminiń ulǵaıýymen birge kartop eksporty da ósti – 18,5%.

Máselen, ótken jyldyń qańtar-qarasha aılarynda 194,8 myń tonna kartop eksporttalsa, 2021 jyly 164,3 myń tonna kókónis syrtqa jiberilgen.

Al ımport óz kezeginde 51,6%-ǵa tómendedi. Eger 2021 jyly syrttan 97,6 myń tonna kartop ákelinse, 2022 jyly 47,3 myń tonna ónim ımporttalǵan.

Aıta keteıik, 2022 jyly sharýashylyqtardyń barlyq sanaty boıynsha kartoptyń egistik alqaby 198,8 myń gektardy qurady.