Qazaqstanda kartıng jarysyna arnalǵan jańa trassalar salý máselesi qarastyrylyp jatyr
ASTANA. 20 sáýir. QazAqparat - Qazaqstanda kartıng (avtomobılderdiń sporttyq jarysy) jarysyna arnalǵan jańa jarys trassalaryn salý josparlanady.
Bul týraly búgin Halyqaralyq avtomobıl federatsııasynyń prezıdenti Jan Todtpen kezdesýinen soń jýrnalısterge bergen suhbatynda Sport jáne deneshynyqtyrý agenttigi tóraǵasynyń orynbasary Murat Omarov málim etti.
«Jalpy atalǵan halyqaralyq uıymnyń qoldaýymen bizdiń elimizdiń aýmaǵynda birqatar halyqaralyq jarystar ótkizý josparlanýda. Bizdiń jazyq dalalyq keńistigimizdiń ózi kópkúndik rallı-reıdter ótkizýge jaqsy múmkindik beredi. Al osyndaı máseleniń barlyǵy aldaǵy ýaqytta Halyqaralyq federatsııa men bizdiń agenttik arasynda tehnıkalyq deńgeıde talqylanatyn bolady. Ázirshe dál qandaı naqty sharalardyń júzege asyrylatyny týraly aıtý erterek», - deıdi M.Omarov.
Onyń sózine qaraǵanda, Halyqaralyq avtomobıl federatsııasy Qazaqstanda aınalma avtokólik jarystaryn, kartıng jarystaryn ótkizgisi kelgenimen, elimizdiń buǵan saı keletin ınfraqurylym damymaǵan. Ásirese, aınalma avtojarystarǵa elimizdiń ınfraqurylymy daıyn emes. Sondyqtan Qazaqstan jol talǵamaıtyn kólikterdiń avtojarysyn ótkizýge qyzyǵýshylyq bildiredi. Bundaı jarysty eldiń batys óńirlerinde ótkizý tájirıbesi bar, «Astana» komandasy da ózin jaqsy tanytyp keledi. Budan bólek, 2014 jyly «Formýla-1» jarysyn ótkiziletini josparlanǵan Reseıdiń tájirıbesin de zerdelesek bolady.
«Kartıngke qatysty aıtar bolsam, sportyń bul túrine Qazaqstanda qyzyǵýshylyq artyp keledi. Osynyń ózi kásibı avtojarysshylardy daıarlaýǵa, jastardy avtokólikti durys basqarýǵa úlken septigin tıgizeri anyq», - dedi M. Omarov.
