Qazaqstanda kartelderge qatysty tergeý júrgizý merzimi uzartylady - UEM

ASTANA. QazAqparat - Qazaqstanda kartelderge qatysty tergeý júrgizý merzimderi uzartylatyn bolady. Bul týraly búgin Májiliste «Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn tanystarǵan Ulttyq ekonomıka vıtse-mınıstri Aıdar Áriphanov málim etti.

Onyń aıtýynsha, zań jobasynda qamtylyp otyrǵan ózgerister birqatar baǵyttardy qamtıtyn bolady. «Birinshiden, monopolııaǵa qarsy zańnamany buzý faktilerine tergeýlerdiń tıimdiligin arttyrý kózdeledi. Bul baǵyt aıasynda zańnamaǵa «kartel» uǵymy (baǵa mámileleri boıynsha) engizilip, oǵan sáıkes tergeýler júrgizý merzimi «úsh aıǵa qosymsha úsh aı» qaǵıdatyna sáıkes uzartylmaq. Búgingi kúni bul norma «eki aıǵa qosymsha eki aı» merzimin qurap otyr. Mundaı qadam kartelder men monopolısterge qatysty kúrdeli ister boıynsha aıtarlyqtaı nátıjege qol jetkizýge jáne tergeýlerdiń sapasyn arttyrýǵa septigin tıgizedi», - dedi A.Áriphanov.

Onyń aıtýynsha, tutastaı alǵanda zań jobasy monopolııaǵa qarsy zań normalaryn jetildirýge baǵyttalady. Budan bólek, bul sala Ekonomıkalyq yntymaqtastyq jáne damý uıymy elderiniń standarttaryna sáıkestendirilip, monopolııaǵa qarsy organdardyń mártebesi naqty aıqyndalady ári jumys tártibi reglamentteledi.