Qazaqstanda qart adamdardyń jaǵdaıyn jaqsartýǵa baǵyttalǵan baǵdarlama jasaý qajet - D.Klebanova
ASTANA. 1 aqpan. QazAqparat /Qanat Mámetqazyuly/ - Qazaqstanda qart adamdardyń jaǵdaıyn jaqsartýǵa baǵyttalǵan baǵdarlama jasaý qajet.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Darıa Klebanova osylaı málim etti.
Qazaqstannyń 2020 jylǵa deıingi Strategııalyq damý josparyna toqtalǵan depýtat óz sózinde, atalǵan kezeńde halyqtyń ómir súrý uzaqtyǵyn 72 jasqa deıin jetkizý kútiletinin atap ótti. Búgingi kúni bul kórsetkish 68,4 jasty quraıdy. Al mejeli kórsetkishke qol jetkizýdiń bir joly qart adamdardyń jaǵdaıyn jaqsartý bolyp tabylady.
«Ókinishke qaraı qart adamdarǵa tıisti nazar aýdarylyp otyrǵan joq. Máselen, halyqtyń osy sanaty densaýlyq saqtaý salasyndaǵy zań shyǵarýshylardyń nazarynan tys qalǵan. Olar ómirlik mańyzdy qyzmetterdi júıelendirilmegen negizde alady. Olarǵa medıtsınalyq kómekti uıymdastyrý jalpy jurtshylyqqa kómek kórsetý qaǵıdatyna negizdelip jasalǵan. Egde jastaǵylardyń erekshelikteri esh eskerilmegen», - dedi D. Klebanova.
Onyń aıtýynsha, olardyń belgili bir bóligi jumysqa qabiletti bolǵanyna qaramastan, qart adamdar eńbek naryǵynda da kemsitýshilikke ushyrap júr.
«Egde jastaǵylar úshin saqtandyrý polıýsin engizý de asa qajet. Aıtylǵandardy eskere kele, Qazaqstanda qart adamdardyń jaǵdaıyn jaqsartýǵa baǵyttalǵan baǵdarlama jasaý qajet dep bilemiz», - deıdi D. Klebanova.
