Qazaqstanda Karpovıch pen Jumasqalıev syndy myqty oıynshylar bar - Belgııa quramasynyń bapkeri J. Lekens
ASTANA. Qazannyń 7-si. QazAqparat /Jasulan Amanbaıuly/ - 2012 jylǵy Eýropa chempıonatyna irikteý týrnıri aıasynda erteń, elordadaǵy «Astana-Arena» stadıonynda Qazaqstan - Belgııa fýtbol quramalarynyń kezdesýi ótedi.
Búgin soǵan oraı, Belgııa quramasynyń bas bapkeri Jorj Lekens match aldyndaǵy baspasóz máslıhatyn ótkizdi. Sózin eń áýeli Qazaqstan elordasynyń ásemdigin jáne «Astana-Arena» alańynyń keremet sapasyn áspetteýden bastaǵan Jorj Lekens, baısaldy áńgimesin Qazaqstannyń fýtbol federatsııasy olarǵa kórsetip jatqan qonaqjaı iltıpatyna alǵys aıtýmen jalǵastyrdy.
«Astana syndy ádemi qalaǵa kelgenimizge qýanyshtymyz. «Astana-Arena» stadıonynyń keremet sapasy da kóńilge qatty jaǵyp otyr. Qazaqstan tarapynan kórsetilgen qonaqjaılylyqqa dán rızamyz. Buny isteýge mindetti emes bolsa da qarsylastarymyz bizge arnaıy jattyǵý alańyn bólip berdi. Sol úshin kóp rahmet», dedi J. Lekens.
Osydan 3-4 jyl buryn Qazaqstan quramasy dál osy komandamen eki ret teń túskeni esimizde. 2006 jyly Eýropa birinshiliginiń irikteý kezeńinde Qazaqstan men Belgııa quramalary bir topqa túsip, Belgııada ótken alǵashqy matchta eki komanda bir-biriniń qorǵanys shepterin buza almaı 0:0 esebimen aıaqtalǵan bolatyn. 2007 jyly qos qarsylas Almatyda kezdesti. Bul joly da teń oıyn boldy, biraq esep 2:2-men qorytyndylanǵan.
«Men bul oıyn bolǵan kezde bapkerlik qyzmette emes edim. Sondyqtan oǵan tolyq baǵa bere almaımyn. Osy ýaqytqa deıin komandalar ózgerdi. Degenmen Qazaqstan Túrkııa quramasymen oınaǵanynda jaqsy deńgeı kórsetti. Komanda taktıkalyq kombınatsııalardy jaqsy oryndady. Bul kezdesýlerde men Karpovıch pen Jumasqalıevtiń kórsetken oıyndaryna qarap, úlken áser aldym», dep atap kórsetti belgııalyq bapker.
Bıylǵy quramanyń sapynda sol jyldary Qazaqstanmen bolǵan oıyndarda oınaǵan Sımmons, Van Bıýıten, Van Damm, Vertongen, Defýr, Kompanı bar jáne erteń Kompanıden basqalarynyń barlyǵy alańǵa shyǵady. Al Qazaqstan quramasynda Belgııamen ótken matchtarda oınaǵan Karpovıch, Jumasqalıev jáne Erismetov bar.
Qazir Qazaqstan men Belgııa eki matchtan ótkizip, ekeýi esh upaı jınaı almady. Qazaqstan quramasy ózi qaqpasyna 5 gol ótkizip alsa, qarsylastaryna birde bir dop salmaǵan. Belgııa fýtbolshylary óz qaqpasyna 4 gol jiberip alyp, 2 dopty qarsylastardyń qaqpasyna salǵan.
Búgini kúni elimizdiń ulttyq quramasy 126-shy orynǵa jaıǵasty. Qazaqstan quramasymen birge EÝRO -2012 jarysynyń irikteý synynda «A» tobyna túsken nemister 4-shi jolaqta, Túrkııa 28-shi, Belgııa 62-shi, Ázirbaıjan quramasy 106-shy satyda tur.
