Qazaqstanda kardıolog tapshylyǵy 4 myńnan asady
ASTANA. KAZINFORM — Qazaqstanda qanaınalym júıesi aýrýlary bar 1,9 mıllıon patsıent medıtsınalyq baqylaýda tur. Alaıda elde kardıolog mamandardyń tapshylyǵy, medıtsınalyq jabdyqtardyń tozýy jáne dári-dármekpen qamtamasyz etý máseleleri áli de ózekti, dep habarlaıdy Kazinform.kz Aikyn.kz saıtyna silteme jasap.
2026 jyldyń basyndaǵy málimet boıynsha, kardıologııalyq qyzmetke qajettilik 4 014 mamandy quraǵanymen, is júzinde 661 maman ǵana jumys isteıdi. Medıtsınalyq jabdyqtardyń tozý deńgeıi shamamen 40 paıyzǵa jetken. Al ambýlatorııalyq dárilik qamtamasyz etý qajettiliktiń 40–50 paıyzyn ǵana óteıdi.
Quryltaı depýtaty, «Ádilet» partııasy fraktsııasynyń múshesi Juldyz Danbaeva osy máselelerdi Densaýlyq saqtaý mınıstri Aqmaral Álnazarovaǵa joldaǵan depýtattyq saýalynda kóterdi.
— Baǵdarlamada salany qaǵaz júzindegi eseppen emes, naýqastyń naqty densaýlyǵymen baǵalaıtyn adamǵa baǵdarlanǵan modelge kóshý mindeti aıqyndalǵan, — dedi depýtat.
Osy rette Quryltaı depýtaty erte dıagnostıkany jetildirýdi, dárigerlerdi qaıta daıarlaýdy, kardıoreabılıtatsııany damytýdy jáne patsıentterdiń jaǵdaıyn qashyqtan baqylaý júıesin engizýdi usyndy.
