Qazaqstanda karbon eginshiligin damytý jol kartasy qashan bekitiledi

ASTANA. KAZINFORM – Elimizde jyl sońyna deıin karbon eginshiligin damytý jol kartasy bekitilmek. Bul týraly Kazinform agenttigi joldaǵan saýalǵa QR Aýyl sharýashylyǵy mınıstrliginiń resmı jaýabynda aıtylǵan.

– QR Prezıdenti Ákimshiliginiń tapsyrmasyna sáıkes múddeli memlekettik organdar, onyń ishinde Aýyl sharýashylyǵy mınıstrligi, Qazaqstanda karbon eginshiligin engizý tásilderin zertteýdi bastaǵan. Jańa bastamalardy qabyldaý úshin aldymen osy máseleni zańnamalyq turǵyda retteý qajet. Osyǵan baılanysty Ekologııa jáne tabıǵı mınıstrligimen birge tıisti jumystar júrgizilip jatyr, - delingen habarlamada.

Sondaı-aq vedomstvo tıisti qujatty ázirleý qashan aıaqtalatynyn málim etti.

– Parlament Májilisiniń jumysynda turǵan «Topyraqty qorǵaý týraly» zań jobasy aıasynda Qazaqstanda kómirtegi eginshiligin damytý máselesi, sondaı-aq tıisti quzyretin pysyqtaý qaralady. Al karbon eginshiligin damytý boıynsha tıisti jol kartasyn bekitý osy jylǵa josparlanyp otyr, - dep jazylǵan jaýapta.

Jyl basynda Úkimet basshysy Oljas Bektenov elimizde karbondy polıgondar qurylatynyn aıtty.

Aıta keteıik, buǵan deıin karbon eginshiligi arqyly Qazaqstanda jylyna $35 mlrd paıda tabý múmkindigi bary jaıly jazǵan edik.