Elimizde qarajıdek pen qaraqat baǵasy qansha
Qazir tosap daıyndaıtyn kez. Kazinform tilshisi óńirlerdegi qarajıde men qaraqat baǵasy salystyrdy.
Jazda qııar men qyzanaqty tuzdap, túrli jemis pen jıdekten tosap ázirlep, qysqa daıyndalady. Kóp tańdaýdyń ishinen qarajıde men qaraqattyń baǵasyn bólek bildik. Onyń óz sebebi bar. Ásirese qara qaraqat qysta sýyq tıip aýyrǵanda óte paıdaly. S dárýmenine baı jıdek ımmýnıtetti de kúsheıtedi. Sonymen birge as qorytý júıesin jaqsartyp, ishtegi toksınderdi shyǵarýǵa septigin tızigedi. Qaraqattyń tosaby este saqtaý qabiletin jaqsartyp, júrek soǵysyn da qalypty ustaıdy.
Qarajıdek tosaby da sýyq tıgende, mazasyz kúı keshkende, ish keýip, asqazan aýyrǵanda birden-bir em. Jıdek quramyndaǵy antotsıan obyr aýrýynyń aldyn alsa, polıfenol Parkınson, Altsgeımer sekildi umytshaqtyq aýrýdy boldyrmaýǵa septigin tıgizedi.
Sonymen qarajıdektiń eń arzany Óskemen men Semeıde satylyp jatyr. Kelisi 1 500 teńgeden bastalady. Al Qyzylorda, Taraz ben Shymkentte jıdektiń bul túri kelisine 1 700 teńge bolyp tur. Qaraǵandy men Túrkistanda kelisi - 1 800 teńge. Almaty, Pavlodar men Qostanaıda qarajıdek baǵasy - 2 000-2 100 teńge. Jezqazǵan, Aqtóbe men Astanada jıdektiń kelisi 2 500 teńge jáne odan joǵary. Al qarajıdektiń eń qymbaty Kókshetaý (3 500 teńge) men Oral qalasynda (jarty kelisi 1 900 teńge, demek kelisi 3900 teńge).
Qara qaraqattyń baǵasy áldeqaıda tómen. Sebebi baý-baqsha ujymdarynda jıdektiń bul túri jıi ósedi. Degenmen keıbir óńirde tek qatyrylǵan túrin satyp alýǵa bolady. Jumsaq qaptamadaǵy qaraqattyń salmaǵy 300 gr bolsa da baǵasy óte joǵary.
Qaraqattyń eń arzany Astana qalasynda satylady. Kelisi - 600 teńge (5 lıterlik shelektiń jartysy 6 000 teńge). Elordada qaraqattyń arnaıy qatyrylǵan túrin de tabasyz. Salmaǵy 300 gr bolatyn jıdektiń quny 1 850-2 325 teńge bolsa, kelisi 5 700 teńgege jetken. Petropavlda qaraqattyń baǵasy 900 teńgeden (5 lıtri - 4 500 teńge) bastalady. Óskemen men Semeıde jıdektiń kelisi 1 200, al Túrkistan men Kókshetaýda 1 500 teńge. Bul jabaıy qaraqattyń baǵasy. Al baý-baqshada óskeni qymbat.
Qara qaraqattyń Aqtóbe men Almatydaǵy baǵasy - 1 800 teńge jáne odan joǵary. Pavlodar, Qaraǵandy men Tarazda baǵa 2 000 teńgeden bastalady. Qostanaı (kelisi 2 500 tg bastalady), Qyzylorda men Jezqazǵanda (2 700 tg) qaraqattan tosap daıyndaý qymbatqa túsedi. Qara qaraqattyń eń qymbaty Shymkentte 3 000 teńge, Oralda jarty kelisi 2 650 teńge, kelisi 5 300 teńge bolyp tur.
Qyzyl tústi qaraqat sırek bolsa da bar. Keıbir óńirden qazir tappaısyz. Tipti saıt arqyly izdegenniń ózinde keziktirmedik.
Eń arzany Petropavlda satylady. Kelisi - 1 000 teńge (5 lıtrlik shelektegi qaraqat - 5000 tg). Óskemen men Semeıde de baǵa 1 000 teńgeden bastalady.
Oral, Qaraǵandy, Pavlodar, Túrkistan men Qostanaıda qyzyl qaraqattyń ortasha baǵasy 1 650 teńgeden bastalyp, 1 900 teńgege deıin jetedi. Kókshetaý, Aqtóbe men Tarazda baǵa Petropavlǵa qaraǵanda eki ese joǵary. Kelisi - 2 000 teńge. Eń qymbat qyzyl qaraqat Jezqazǵan (2 500 tg) ben Astanada (300 gr qyzyl qaraqat baǵasy 1 260 teńge, kelisi 3 900 tg bolady) satylyp jatyr.
Ótken aptada tez daıyndalatyn kespe men ramen baǵasy jazyldy.